सशस्त्र प्रहरी भीखमपुर विओपीद्वारा १० केजी चरेश सहित दुईजना पक्राउ
ट्रिब्यून न्युज
वीरगन्ज, १८ असोज । सशस्त्र प्रहरी बोर्डर आउट पोष्ट (बिओपी) भीखमपुरको टोलीले १० केजी चरेश सहित दुईजनालाई पक्राउ गरेको छ । प्रतिबन्धित लागूऔषध ओसार पसार भईरहेको सूचनाका आधारमा गस्तीमा रहेको सशस्त्र प्रहरी बोर्डर आउटपोष्टका सशस्त्र प्रहरी निरीक्षक राजाराम बस्नेतको नेतृत्वको सशस्त्र प्रहरीले २० पोकामा रहेको १० केजी चरेश सहित दुईजनालाई पक्राउ गरेको हो ।
बि आर २० एक्स २७३७ भारतीय नम्बरको मोटर साईकलमा नेपाल भारत सीमानाका पिडारीको सडकबाट जानकीटोला हुदै भारततर्फ तस्करी गईरहेको अवस्थामा पर्साको जगरनाथपुर गाउँपालिका वडा नम्बर २ बाट उनीहरुलाई पक्राउ गरेको सशस्त्र प्रहरी नेपाल १३ नम्बर गण पर्साका सशस्त्र प्रहरी उपरीक्षक राजेन्द्र खड्काले जानकारी दिनुभयो ।
पक्राउ पर्नेमा पर्साको जीराभवानी गाउँपालिका वडा नम्बर ३ हरैयाका १८ बर्षका किसन माझी र १६ बर्षका सुनिल माझी रहेको सशस्त्र प्रहरी उपरीक्षक खड्काले बताउनुभयो ।
