लागू औषध गाँजा र ट्रक सहित २ जना पक्राउ
ट्रिब्यून न्युज
वीरगन्ज, १९ भदौ । जिल्ला प्रहरी कार्यालय बाराले प्रतिबन्धित लागूऔषध गाँजा र ट्रक सहित दुईजनालाई पक्राउ गरेको छ । बिशेष सूचनाको आधारमा आईतबार बिहान ३ः३० बजेको समयमा इलाका प्रहरी कार्यालय अमलेखगंज, बाराबाट खटिएको प्रहरी टोलीले बारा जितपुरसिमरा उप-महानगरपालिका वडा नं.२१ अमलेखगंजबाट गाँजा र ट्रक सहित दुईजनालाई पक्राउ गरेको हो ।
हेटौडाबाट पथलैयातर्फ आउदै गरेको प्र. ३–०१–००३ क ६९०६ नं. को मिनी ट्रकलाई हेटौडा–पथलैया सडक खण्डमा सवारी साधनहरू चेकजाँच गर्ने क्रममा ट्रकको पछाडिको भागमा बिस्कुटको कार्टुनसँगै रातो प्लाष्टिक भित्र प्लाष्टिकको डोरीले बाँधेर पोका बनाई लुकाई राखेको अवस्थामा प्रतिबन्धित लागू औषध (गाँजा) ३४ किलो बरामद गरेको जिल्ला प्रहरी कार्यालय बाराका प्रवक्ता प्रहरी निरीक्षक रामकाजी थापाले जानकारी दिनुभयो ।
गाँजा बरामद भएपछि ट्रकका चालक जिल्ला मकवानपुर मनहरी गाँउपालिका वडा नं.०७ बिजौना टोल बस्ने बर्ष ३५ को सुन बहादुर थिङ र सह–चालक मनहरी गाउँपालिकाकै वडा नं.–१ चकरी टोल बस्ने बर्ष २० को सुभाष लामालाई नियन्त्रणमा लिएको प्रहरीले जनाएको छ ।
गाँजा र मिनि ट्रक सहित पक्राउ परेका उनीहरुलाई लागू औषध मुद्दामा थप अनुसन्धान भइरहेको बाराका प्रहरी प्रमुख प्रहरी उपरीक्षक होबिन्द्र बोगटीले जानकारी दिनुभयो ।
