जसपाको भोट माग्न जाँदा कांग्रेस कार्यकर्ताको कुटाईबाट गम्भीर घाईते, कवही प्रहरी चौकी बेखबर
ट्रिब्यून न्युज
वीरगन्ज । बाराको सुवर्ण गाउँपालिकामा जसपाका एक कार्यकर्तालाई कांग्रेसका कार्यकर्ताहरुले कुटपिट गरेर गम्भीर घाईते बनाएका छन् । सुवर्ण गाउँपालिका वडा नम्बर २ का नेपाली कांग्रेसका कार्यकर्ताहरुले वडा नम्बर ३ का स्थानीय जसपाका कार्यकर्ता सौरभ कुमार यादवलाई कुटपिट गरेर गम्भीर घाईते बनाएका हुन् ।
जसपाका सौरभ यादव लगायत भोट माग्न जाँदा कांग्रेसका ब्रह्मा यादव, शेषनाथ यादव, पप्पु यादव, राजेश्वर यादव लगायतले कुटपिट गरेको प्रहरीले जनाएको छ । कुटपिटबाट सौरभ यादव गम्भीर घाईते हुनुभएको छ । उनीहरुले गएराति सौरभलाई मरणासन्न हुनेगरी कुटपिट गरेर फालेको अवस्थामा स्थानीयले देखेपछि परिवारलाई खबर गरेका थिए ।
अचेत अवस्थामा रहेका घाईते यादवलाई तत्काल उद्दार गरेर उपचारको लागि नेशनल मेडिकल कलेजमा पठाएको थियो । उहाँको अहिले वीरगन्जको नेशनल मेडिकल कलेजको सघन उपचार कक्षमा उपचार भईरहेको छ । घटनाको विषयमा बारा प्रहरी भने बेखबर छ । सुवर्ण गाउँपालिकामा रहेको कवही प्रहरी चौकीका प्रहरीलाई घटनाको विषयमा जानकारी नभएको बाहाना बनाएको पीडितका आफन्तले आरोप लगाएका छन् ।
अहिले नेशनल मेडिकल कलेजबाट प्रहरीलाई जानकारी दिएपछि बल्ल सोधीखोजी गरिरहेको छ । जिल्ला प्रहरी कार्यालय बाराका प्रवत्ता प्रहरी नायव उपरीक्षक राजेश थापाले पनि सुवर्ण गाउँपालिकाको घटनाको विषयमा जानकारी नआएको बताउनुभयो ।
उहाँले देवताल गाउँपालिका वडा नम्बर २ मा हिजो दिउँसो १ बजे स्थानीय अनिल यादवलाई रोशन यादवले कुटपिट गरेको घटना मात्रै प्रहरीको जानकारी रहेको बताउनुभयो । रोशनले कुटपिट गरेका अनिलको टाउको चोट लागेको उहाँले बताउनुभयो । अनिलको नारायणी अस्पतालमा उपचार भईरहेको प्रहरी नायव उपरीक्षक थापाले बताउनुभयो ।
