वीरगन्जको खानेपानी संस्थान नजिकै एक घरमा चोरी
ट्रिब्यून न्युज
बारा १५ कार्तिक । वीरगन्जको खानेपानी संस्थान नजिकैको एक घरमा चोरी भएको छ । पानीटंकी स्थित नेपाल खानेपानी संस्थान कार्यालय नजिकैको कृष्ण कलवारको घरमा कोठा भाडामा लिएर बस्दै आउनुभएका धोविनी गाउँपालिकाका इञ्जिनियर रबिभूषण पटेलको कोठामा चोरी भएको हो ।
घरबेटी कलवार पोखरा गएको र इञ्जिनियर पटेलपनि गाउँ गएको मौका छोपेर घरमा कोही नभएको बेला चोरले ढोका फोडेर चोरी गरेको पीडित पटेलले जानकारी दिनुभयो । पटेलको कोठाबाट दुईओटा ल्यापटप, डेढलाख रुपैंया नगद लगायतका सरसामान चोरी भएको उहाँले बताउनुभयो ।
घरबेटी पनि नभएको र आफूपनि गाउँबाट फर्किएर आउँदा कोठाबाट चोरी भएको थाहा पाएको बताउनुभयो । घटनापछि प्रहरी पुगेर अनुसन्धान पनि शुरु गरेको छ । पछिल्लो समयमा वीरगन्जका मुख्य बजारहरुमा चोरीको घटनाहरु बढ्न थालेका छन् ।
चाडबाडमा सबैजना घर गएको मौका छोपेर चोरको गिरोहले चोरी गर्ने गरेका छन् । दशैंको बेला नै वीर्तामा पनि एक घरमा चोरी भएको थियो । उक्त चोरीको घटनामा दुईजना चोरलाई पर्सा प्रहरीले पक्राउ गरिसकेको छ ।
