सशस्त्र प्रहरी पर्साद्वारा वील विजक भन्दा बढीको सामान सहित तीन ट्रक बरामद
ट्रिब्यून न्युज
वीरगन्ज, २५ असोज । सशस्त्र प्रहरीले पर्साबाट वीलविजक भन्दा बढी मूल्यको सामान लोड गरेको तीनवटा मालवाहक ट्रक नियन्त्रणमा लिएको छ । सोमबार मध्यरातमा वीरगन्ज महानगरपालिका वडा नम्बर–२४ स्थित रामगढवा वोर्डर आउट पोष्ट (विओपी) ड्राईपोर्ट र (विओपी) सिर्सियाबाट खटिएको सशस्त्र प्रहरीको संयुक्त टोलीले तीनवटा ट्रक नियन्त्रणमा लिएको हो ।
विलमा उल्लेख भएको भन्दा बढी सामान लोड भएको विशेष सूचनाको आधारमा चेकजाँच गर्ने क्रममा जय माँ दुर्गा रोड क्यारियर्सबाट लोड भएको ना ३ ख १००९ नम्बरको ट्रकबाट १० लाख ५४ हजार ६३६, श्री दुर्गा रोड क्यारियर्सबाट लोड भएको ना ६ ख १८७८ नम्बरको ट्रकबाट ३ लाख ६१ हजार ५३७ मुल्य बराबरको
श्री दुर्गा रोड क्यारियर्सिबाट लोड भएको ना ६ ख ७१ ट्रकबाट ९ लाख ३२ हजार ६८० मूल्य बराबरको सामान बरामद गरिएको सशस्त्र प्रहरी बल १३ नम्बर गण हेडक्वार्टर पर्साका प्रवक्ता सशस्त्र प्रहरी नायव उपरीक्षक संतोष बस्नेतले जानकारी दिनुभयो ।
३ वटा ट्रकहरुमा लोड भएको २३ लाख ४८ हजार ८५८ मूल्य बराबरको कस्मेटीक सामान, लेडिज जुत्ता, स्टेशनरीको सामान, ईलेक्ट्रिक सामान र तीनवटा ट्रकको मूल्य गरी १ करोड १३ लाख ४८ हजार ८५८ रुपैंया मूल्यांकन गरी आवश्यक कारवाहिको लागि राजश्व अनुसन्धान कार्यालय पथलैयामा बुझाईएको सशस्त्र प्रहरी प्रवक्ता सशस्त्र प्रहरी नायव उपरीक्षक बस्नेतले बताउनुभयो ।
