श्रीमतीको हत्या गर्ने श्रीमान र देवर पक्राउ
ट्रिब्यून न्युज
वीरगन्ज, ६ पुस । आफ्नै श्रीमतीलाई करेण्ट लगाएर हत्या गरेको आरोपमा श्रीमान सहित देवर पनि पक्राउ परेका छन् । पक्राउ पर्नेमा पर्सा वीरगञ्ज महानगरपालिका वडा नं.–२७ जसौलीका ३४ बर्षीय कुशल दास र २८ बर्षीय भरत दास रहेका छन् ।
कुशलले आफ्नी ३० बर्षकी श्रीमती रिंकुदेवी परपुरुषसँग लागेको शंकामा मंगलबार मध्यराति विजुलीको नाङ्गो तार हातमा प्रवाह गरी हत्या गरेको प्रहरीको अनुसन्धानबाट खुलेको छ ।
रिंकुको मृत्यु भएपछि कुशलका सहोदर भाई वर्ष २८ का भरत दासलाई बोलाएर भरतले चलाउने ना. ३ च. ६२४७ नम्बरको कुखुराको चल्ला बोक्ने बोलेरो गाडीमा मृतकको लाशलाई बाहिर निकालेर टाउको किचेको अनुसन्धानबाट खुलेपछि उनीहरुलाई पक्राउ गरेको पर्साका प्रहरी प्रवक्ता प्रहरी नायव उपरीक्षक दीपक गिरीले जानकारी दिनुभयो ।
अधवैंसे महिलाको टाउको किचिएको अवस्थामा लडिरहेको सूचना पाएपछि अस्थायी प्रहरी पोष्ट उदयपुर घुर्मी, वडा प्रहरी कार्यालय श्रीपुरका प्रहरी निरीक्षक डिल्लीराज सापकोटा, जिल्ला प्रहरी कार्यालय पर्साबाट प्रहरी निरीक्षक मनोज कुमार यादव समेतको
अनुसन्धान अधिकृतहरुको टोलीले घटनास्थलमा पुगी सुक्ष्म अनुसन्धान गर्दा कुशलले हत्या गरेको खुलेको प्रहरी नायव उपरीक्षक गिरीले बताउनुभयो । अभियुक्त कुशल र भरतलाई कर्तव्य ज्यान मुद्दामा थप अनुसन्धानका लागि हिरासतमा राखिएको जिल्ला प्रहरी कार्यालय पर्साले जनाएको छ
