वीरगन्ज उद्योग वाणिज्य संघको पदाधिकारी निर्विरोध चयन
ट्रिब्यून न्युज
वीरगन्ज, ३० फागुन । वीरगन्ज उद्योग वाणिज्य संघको पदाधिकारी सर्वसम्मत चयन भएको छ । ३५ सदस्यीय कार्यसमिति सर्वसम्मत चयन गरेपछि त्समध्यबाट पदाधिकारी चयन गर्ने विधान अनुसार संघको पदाधिकारीमा सर्वसम्मत चयन गरिएको हो ।
संघका अध्यक्षमा अनिल अग्रवाल (पटावारी, बरिष्ठ उपाध्यक्ष हरि गौतम, उपाध्यक्षमा माधव राजपाल, महासचिवमा आशिष लाठ, कोषाध्यक्षमा शिवजी प्रसाद साह कलवार उद्योग सचिवममा सुशान्त चाचान, वाणिज्य सचिव प्रेमचन्द गोयल सर्वसम्मत चयन भएका छन् । त्यस्तै सहकोषाध्यक्ष अनोज रूंगटा, सहसचिवमा नरेश टिवडेवाल र निरज अग्रवाल पनि सर्वसम्मत चयन भएको छ ।
पदाधिकारीहरुका लागि मनोनयन दर्ता गरेकाहरु विरुद्धमा कसैको पनि उम्मेदवारी नपरेपछि सर्वसम्मत चयन भएको मुख्य निर्वाचन अधिकृत बालमुकुन्द खरेलले जानकारी दिनुभयो । मंगलबार मध्यान्ह १२ बजेदेखि दिउँसो २ बजेसम्म पदाधिकारी पदको मनोनयन दर्ता प्रकृया शुरू भएको थियो ।
पदाधिकारीको नामावली प्रकाशन दिउँसो २ः३० बजे र दावी विरोध २ः४५ बजेसम्म तोकिएको थियो । तोकिएको समयभित्रमा एकजना उपाध्यक्षमा दुईजनाको मनोनयन परेको थियो । पदाधिकारीमा आकांक्षीहरु धेरै भएपनि सहमतिमा ल्याउन नेतृत्वपंक्ति सफल भएका छन् ।
दुईजनाको मनोनयन दर्ता भएको उपाध्यक्षमा पनि सहमतिपछि एकजनाले उम्मेदवारी फिर्ता लिएपछि पदाधिकारी निर्विरोध भएको हो । उपाध्यक्षमा माधव राजपाल र अरविन्द अमात्यको उम्मेदवारी परेको थियो । दुवैजनालाई राखेर छलफल गरेपछि अमात्यले मनोनयन फिर्ता लिएपछि पदाधिकारी निर्विरोध भएको हो ।
यसले उद्योग व्यापार क्षेत्रको राजनीतिमा नयाँ सन्देश दिएको उद्योगी व्यावसायीहरूको प्रतिक्रिया छ । व्यापार व्यावसायमा प्रतिस्पर्धा भएपनि निजीक्षेत्रको छाता संगठनको राजनीतिमा भएको सहमतिले व्यावसायीहरूलाई एकताबद्ध बनाउन सहयोग पुगेको उनीहरू बताउछन् ।
