फुटबलका गुरु हरि बहादुर श्रेष्ठको निधन, जिल्ला फुटबल संघद्वारा झण्डा ओढाएर अन्तिम श्रद्धाञ्जली अर्पण
ट्रिब्यून न्युज
वीरगन्ज, २२ साउन । वीरगन्जका फुटबल प्रशिक्षक हरि बहादुर श्रेष्ठको निधन भएको छ । श्रेष्ठको आज बिहान १ बजे नेशनल मेडिकल कलेजमा ७५ बर्षको उमेरमा निधन भएको हो । दुईबर्ष अघि सामान्य मुटुको उपचार गराउनु भएका उहाँको स्वास्थ्य अवस्था सामान्य नै रहेपनि हिजो अचानक स्वास्थ्यमा समस्या आएपछि नेशनल मेडिकल कलेजमा उपचारका लागि लगिएको थियो ।
श्रेष्ठको उपचारको क्रममा अस्पतालमै निधन भएको परिवारजनले बताएका छन् । उहाँको आजै अशोक वाटिका स्थित श्मसानघाटमा अन्त्यष्टि गरिएको छ । उहाँको पार्थिव शरीरमा पर्सा जिल्ला फुटबल संघ पर्साले झण्डा ओढाएर अन्तिम श्रद्धाञ्जली दिएको थियो । पर्सा जिल्ला फुटबल संघका अध्यक्ष अनिल कलवार (रोशन) लगायत पदाधिकारीहरुले झण्डा ओढाएर श्रद्धाञ्जली दिएका हुन् ।
२००५ सालमा जन्मिनु भएका श्रेष्ठ जिल्ला खेलकुद विकास समिति पर्साको फुटबल प्रशिक्षकका नियुक्त भई सेवानिवृत्त हुनुभएको थियो । उहाँ झण्डै ४० बर्ष प्रशिक्षकका रुपमा सक्रिय रहनुभएको थियो । श्रेष्ठको निधनले पर्सा जिल्ला फुटबल संघले एकजना अभिभावक गुमाउनु परको संघका अध्यक्ष गुप्ताले बताउनुभयो । उहाँको निधनले पर्सा जिल्लामा मात्रै नभई समग्र फूटबल क्षेत्रमा नै अपुरणीय क्षति भएको गुप्ताको भनाई छ ।
