केटी जिस्क्याएको निहुँमा कुटपिट हुँदा एकको मृत्यु
ट्रिब्यून न्युज
वीरगन्ज, २४ साउन । पर्साको पर्सागढी नगरपालिकामा किशोरले किशोरीलाई जिस्क्याएको विषयमा झडप भई कुटपित हुदाँ एक युवकको मृत्यु भएको छ । १६ वर्षीया किशोरीलाई १७ वर्षीय किशोरले टेलिफोन मार्फत जिस्क्याएको विषयलाई लिएर कुटपिट हुँदा पर्सागढी नगरपालिका–४ वारवाटाडी बस्ने २१ वर्षीय जमुदिन महमद अन्सारीको मृत्यु भएको हो ।
उक्त कुटपिट तथा झै–झगडामा संलग्न रहेको अभियोगमा सोही ठाउँ बस्ने २४ वर्षीय अबतुल्लाह मिया अन्सारी र ४५ वर्षीय वकिल महमद अन्सारीलाई प्रहरीले पक्राउ गरेको छ ।
उक्त विषयमा वकिल महमद अन्सारी र अली महमद अंसारीबीच गत शनिबार राति झै–झगडा तथा कुटपिट भएको अवस्थामा अबतुल्लाह मिया अन्सारीले चिर्पटले प्रहार गर्दा गम्भीर घाइते भएका जमुदिनको नारायणी अस्पताल वीरगन्ज हुँदै एलएस न्युरो अस्पताल बारामा थप उपचारको क्रममा हिजो बिहान मृत्यु भएको हो । घटना सम्बन्धमा थप अनुसन्धान भईरहेको पर्साका प्रहरी प्रवक्ता डिएपसी दिपक गिरीले जानकारी दिनुभयो ।
