महुवनमा दुई मोटरसाईकल जुध्दा चारजना घाईते
ट्रिब्यून न्युज
आर.के.चौधरी
सखुवा प्रसौनी, १४ साउन । पर्साको सखुवाप्रसौनी गाउँपालिका वडा ५ महुवन प्रहरी चौकी अगाडि दुईवटा मोटरसाइकल एकआपसमा ठोकिँदा चारजना घाईते भएका छन् । वीरगंज महानगरपालिका वडा नम्बर २२ जगरनाथपुर बस्ने अन्दाजी १७ बर्ष अलीराज मन्सुरी, सोही स्थान बस्ने अन्दाजी १९ बर्षका सर्फराज र अन्दाजी १८ बर्षको सोनु भन्ने घाईते भएका हुन् ।
ना १५ प ९१४१ नम्बरको हिरोहोण्डा मोटरसाइकलमा पटेर्वासुगौली गाउँपालिका वडा १ मा लाग्ने भाथा मेला जानेक्रममा तीनैजना दुर्घटनामा परेका हुन् । महुवनको प्रहरी चौकी अगाडि ग २ प ६१४ को मोटरसाइकललाई ठोकेका थिए ।
६१४ नम्बरको मोटरसाइकल चालक अरनिका टेक्सटाईल परवानीपुरबाट काम गरेर घरतर्फ आउने क्रममा सीबीजेड मोटरसाइकलमा सवार रहेका युवाले पछाडि बाट ठोकेर घाईते बनाएको हो । ग २ प ६१४ मा सवार पटेर्वासुगौली गाउँपालिका वडा २ बेल्वाका राजकुमार प्रसाद दास थारुको दायाँ खुट्टा भाँचिएको छ। घाइते चार जनालाई उपचारको लागि वीरगन्ज पठाईएको छ।
