पर्साको धोबिनीमा एक युवक मृत अवस्थामा फेला
ट्रिब्यून न्युज
वीरगन्ज, २१ भदौ । पर्साको धोबिनी गाउँपालिकामा एक युवक मृत अवस्थामा फेला परेका छन् । धोविनी गाउँपालिका वडा नम्बर ४ लंगडी चोक स्थित मनि ट्रान्सफर रहेको जस्तापाताले छाएको छानामा अंदाजी २२/२३ वर्षका युवकको शव फेला परेको हो । मृत अवस्थामा फेला परेका युवकको पहिचान भने खुल्न सकेको छैन ।
शव, पोष्टमार्टमका लागि वीरगन्ज स्थित नारायणी अस्पतालमा पठाइएको पर्साका प्रहरी उपरिक्षक बेल बहादुर पाण्डेले जानकारी दिनुभयो । भदौ १७ गते बिहीबार राति लंगडीमै रहेको एनआइसी एसिया बैंकको उपशाखामा चोरी भएको थियो । त्यहि बैंक नजिकको मनि ट्रान्सफर भएको घरको छानामा हिजो बेलुकी युवकको शव फेला परेको हो ।
मृत भेटिएका युवक गत बिहिबार राति एनआइसी एशीया बैंकमा भएको चोरी गर्ने समूह मध्येकै रहेको हुन सक्ने आशंका स्थानीयले गरेका छन् । बैंकमा चोरी गर्ने समूहले मनी ट्रान्सफरमा समेत चोरी गर्न जाँदा छानाको जस्तापाता उप्क्याएर भित्र छिर्ने क्रममा बिजुलीको नाङगो तार छोएर करेन्ट लागी ती युवकको मृत्यु भएको हुन सक्ने स्थानीयले अनुमान गरेका छन् ।
शवको प्रकृति हेर्दा , ती युवक मनि ट्रान्सफरको कार्यालयमा चोरी गर्न गएको र त्यस क्रममा करेन्ट लागेर उनको मृत्यु भएको हुन सक्ने प्रहरीको पनि अनुमान छ । बिहीबार राति बैंकमा भएको चोरी र आइतवार बेलुकी मनिट्रान्सफरमा युवकको शव भेटिएपछि घटना अझ शंकास्पद देखिएकाले प्रहरीले दुवै घटनालाइ जोडेर अनुसन्धान थालेको प्रहरी उपरिक्षक पाण्डेले बताउनुभयो ।
