साहिब बाबाको अवतरण दिवसमा वृक्षरोपण र स्वास्थ्य शिविरको आयोजना
ट्रिब्यून न्युज
वीरगञ्ज । साहिब बाबाको १ सय २३ औँ अवतरण दिवसको अवसरमा वीरगञ्जमा विरुवा रोपिएको छ । वीरगञ्जको ठाकुरराम बहुमुखी क्याम्पस पछाडी रहेको साहिब दरबारका जग्गामा विरुवा रोपिएको हो । वीरगञ्ज महानगरपालिकाका प्रमुख राजेशमान सिंहले विरुवा रोप्दै वातावरण संरक्षणसँगै वीरगञ्जलाई हराभरा बनाउनका लागि सबैले खाली ठाउँमा विरुवा रोप्नुपर्ने बताउनुभयो ।
उहाँले आफ्नै कार्यकालमा महानगरलाई हराभरा र सुन्दर बनाउने प्रतिबद्धता व्यक्त गर्दै महानगरलाई पर्यटकीय गन्तव्यको रुपमा विकास गर्नुपर्नेमा जोड दिनुभयो । साहिब बाबाको सन्देशलाई आत्मसाथ गर्नुपर्ने र समाजमा शान्त र भाइचारा बढाउनुपर्ने महानगर प्रमुख सिंहको भनाई छ । पछिल्लो समयमा धार्मिक साम्प्रदायिकता भड्काउने र उच्छृंखल गतिविधि बढ्दै गएको प्रति चिन्ता व्यक्त गर्दै उहाँले धार्मिक सहिष्णुता र सद्भावलाई कायम राख्नुपर्ने आवश्यक्ता औँल्याउनुभयो ।
सो अवसरमा कटहर, निम्बु, मलेसियन, काउली बदाम, रोयल पाम लगायतका विभिन्न प्रजातीका विरुवा रोपिएको साहिब दरबार संस्थानका अध्यक्ष उमेशलाल सहनीले जानकारी दिनुभयो । विरुवा रोपेर साहिब बाबाको अवतरण दिवस मनाइएको संस्थानका अध्यक्ष सहनीले बतानुभयो । जसपाका नेता प्रेमबाबु पटेल, महिला नेतृ रमिता माया गुप्ता, ग्रिनसिटी सामुदायिक सेवा केन्द्र आदर्शनगरका अध्यक्ष जयप्रकाश खेतान, प्रेरणा श्रेष्ठ लगायतको उपस्थिति रहेको थियो ।
यसैबीच साहिब दरबारको आयोजनामा वीरगञ्जमा स्त्री तथा प्रसुती रोग सम्बन्धी निःशुल्क स्वास्थ्य शिविरको आयोजना गरेको छ । बुधवारदेखि वीरगञ्जको घण्टाघरस्थित डा. श्वेता गुप्ताको क्लिनिकमा सुरु भएको स्वास्थ्य शिविर शुक्रवार समापन भएको छ। दुई दिनसम्म चलेको शिविरमा अहिलेसम्म १ सय भन्दा धेरैले चेकजाँच गराएका छन् ।
