१० बर्षीया बालिका रिजवानाको हत्याका अभियुक्त पक्राउ
ट्रिब्यून न्युज
वीरगन्ज, १६ माघ । वीरगन्ज महानगरपालिका वडा नम्बर १६ कञ्चनजंघा विद्यालय नजिकै भएको बालिका हत्या अभियागमा एकजनालाई प्रहरीले पक्राउ गरेको छ । पक्राउ पर्नेमा जिल्ला पर्सा वीरगञ्ज महानगरपालिका वडा नं.–१६ बस्ने मोती पटेल भन्ने मोतीलाल प्रसाद कुर्मी रहेका छन् ।
पुष २४ गते वडा नं.–१६ कंचनजंगा स्कुल नजिक नयाँ निर्माणाधीन भवनको उत्तरपट्टिको चेपमा वडा नं.–१५ भिष्वामा डेरा गरी बस्ने सरोज महतो कुश्वाहाकी वर्ष १० की छोरी रिजवाना महतोको टाउकोमा ढुङ्गा प्रहार गरी हत्या गरिएको अवस्थामा शव फेला परेको थियो ।
सोही घटनाको अनुसन्धानको क्रममामा पीडितबाट प्राप्त किटानी जाहेरी दरखास्तको आधारमा अहिलेसम्म गरिएको अनुसन्धानबाट खुल्न आएका तथ्य र प्रमाणहरूको आधारमा उनलाई पक्राउ गरिएको जिल्ला प्रहरी कार्यालय पर्साले जनाएको छ ।
उनलाई जिल्ला प्रहरी कार्यालयबाट खटिएको टोलीले ईनर्वास्थित नेपाल भारत सीमाबाट माघ २ गते पक्राउ गरेको थियो । पक्राउ परेका मोतीलाई अपहरण तथा कर्तव्य ज्यान मुद्दामा थप अनुसन्धान गरीरहेको जिल्ला प्रहरी कार्यालय पर्साका प्रवक्ता प्रहरी नायव उपरीक्षक ओमप्रकाश खनालले बताउनुभयो ।
