सामुदायिक विद्यालयले शैक्षिक सत्रको बीचमै भर्ना लिएकोमा निजी विद्यालयको ध्यानाकर्षण
ट्रिब्यून न्युज
वीरगन्ज, १९ पुस । वीरगन्ज महानगरपालिकाका केही सामुदायिक विद्यालयहरुमा स्थानान्तरण प्रमाणपत्र र चारित्रिक प्रमाणपत्र बिना नै विद्यार्थी भर्ना लिइएको भन्दै संस्थागत विद्यालयहरुको संगठन प्याब्सन र एन प्याब्सनले हिजो बीरगन्ज महानगरपालिकाको शिक्षा महाशाखा प्रमुखलाई ध्यानाकर्षण पत्र बुझाएका छन् ।
प्याब्सनका अध्यक्ष पुरन प्रधान र एन प्याब्सनका अध्यक्ष रामराज श्रेष्ठको नेतृत्वमा गएको टोलीले महाशाखा प्रमुख अरविन्दलाल कर्णलाई ध्यानाकर्षण पत्र बुझाएको हो ।
बीरगन्ज महानगरपालिका भित्रका अंग्रेजी माध्यम सन्चालन गर्ने केही सामुदायिक विद्यालयहरुले स्थानान्तरण प्रमाणपत्र टिसी र चारित्रिक प्रमाणपत्र सीसी नै नलिई संस्थागत विद्यालयमा अध्ययनरत विद्यार्थीलाई शैक्षिक सत्रको बीचमै जथाभावी भर्ना लिएको भन्दै महानगरपालिकाको शैशिक प्रशासन महाशाखाको ध्यानाकर्षण गराएको हो ।
फर्जी स्थानान्तरण प्रमाणपत्र (टीसी) र चारित्रिक प्रमाणपत्र (सीसी) बनाई त्यसकै आधारमा भर्ना लिएको प्याब्सन र एन प्याब्सनको आरोप छ । संस्थागत विद्यालयमा अध्ययन गरेको समयको लाखौं शुल्क विद्यार्थीहरुबाट असुल उपर गर्न बाँकी गरेको अवस्थामा स्थानान्तरण प्रमाणपत्र (टीसी) र चारित्रिक प्रमाणपत्र (सीसी) बिना विद्यार्थी भर्ना लिएर आफूहरुको आम्दानी जोखिममा पारेको प्याब्सनका अध्यक्ष पुरन प्रधानले बताउनुभयो ।
असुल उपर गर्न बाँकी रहेको बक्यौता असुलका लागि लिखित र मौखिक रुपमा ती सामुदायिक विद्यालयका प्रधानाध्यापकलाई बारम्बार आग्रह गर्दा समेत कुनै सुनुवाई नभएको एन प्याब्सनका अध्यक्ष रामराज श्रेष्ठले बताउनुभयो ।
ध्यानाकर्षण पत्र बुझाउदैं प्याब्सन र एन प्याब्सनको टोलीले सामुदायिक विद्यालय र प्रधानाध्यापबाट बाँकी बक्यौता असुल उपर गर्न समन्वय गरिदिन महाशाखा प्रमुख कर्णसँग माग गरेका छन् । ध्याकर्षण पत्र बुझाउन गएको प्याब्सन र एन प्याब्सनको संयुक्त टोलीमा प्याब्सनका बरिष्ठ उपाध्यक्ष सरोज प्रसाद चौधरी, सचिव राहुल श्रीवास्तव, एन प्याब्सनका उपाध्यक्ष विनोद गुप्ता, कोषाध्यक्ष राजेश लिम्बु लगायतको सहभागिता रहेको थियो ।
