पार्टीका नेता कार्यकर्ताहरुलाई बदनाम गर्ने कुनैपनि गतिविधि नगर्न नेकपा (माओवादी केन्द्र)को निर्देशन
ट्रिब्यून न्युज
वीरगन्ज, २३ असोज । नेपाल कम्युनिष्ट पाटी (माओवादी केन्द्र) मधेस प्रदेशले आफ्ना नेता कार्यकर्ताहरुलाई लञ्छना लगाउने वा बदनाम गर्ने कुनैपनि कुराहरु सार्वजनिक रुपमा नलेख्न निर्देशन गरेको छ ।
पार्टीका केन्द्रीय सचिव तथा मधेस प्रदेश इञ्चार्ज लीलामणि पोख्रेलले पार्टी र पार्टीका नेता कार्यकर्ताहरु प्रति लक्षित कुनैपनि प्रकारका लेख, रचना, तथा सामाजिक सञ्जालमा स्टाटस नलेख्न आन्तरिक परिपत्र गर्नुभएको छ ।
आफूलाई चित्त नबुझेको विषय भए सम्बन्धित कार्यालयमा लिखित रुपमा लेखेर पठाउन सक्ने भन्दै सार्वजनिक रुपमा नेता कार्यकर्ताहरुलाई बदनाम गर्ने गरी लेख, रचना र स्टाटस नलेख्न निर्देशन दिएको हो ।
सचिव पोख्रेलले गर्नुभएको परिपत्रमा भनिएको छ, “जनतासंग माओवादी विशेष रूपान्तरण अभियान “घरघरमा माओवादी जनजनमा माओवादी” सञ्चालन गरेको आजको संवेदनशील अवस्थामा केन्द्रीय सदस्य, वैकल्पिक केन्द्रीय सदस्य, आयोगका सदस्य, मधेश प्रदेश, आठवटै जिल्ला एवं जनवर्गीय मोर्चा समेत केन्द्रीय पदाधधकारी र सदस्यदेखि वडासम्मका पदाधधकारी र सदस्यहरु तथा पार्टीका साधारण सदस्य समेतले पार्टीभित्र कसैप्रति लाञ्छाना लगाउने वा बदनाम गर्ने कुनै पनि लेख, रचना वा स्टाटस लेखि सामाजिक सञ्जालहरूमा पोष्ट नगर्नु होला ।”
यदि कुनै नेता कार्यकर्ता त्यस्ता गतिविधिमा संलग्न भएको पाईएमा नेकपा (माओवादी केन्द्र) पार्टीको विधान अनुरूप कायावाहीको दायरामा ल्याउने समेत चेतावनी दिएको छ ।
