नेपालको राष्ट्रिय सुरक्षा चुनौती धार्मिक अतिवाद र आतंकवाद हो : वक्ताहरु
ट्रिब्यून न्युज
वीरगञ्ज, ८ मंसिर । धार्मिक अतिवाद र आतंकवादबाट मुलुकलाई जोगाउन सरोकारवालाले आग्रह गरेका छन् । राष्ट्रिय एकता अभियान पर्साले आयोजना गरेको नेपालको राष्ट्रिय सुरक्षा र २६/११ मुम्बई हमला विषयक परिचर्चा कार्यक्रममा बोल्ने वक्ताहरुले धार्मिक अतिवाद र आतंबाद दुवै क्रियाकलापले नेपालको राष्ट्रिय सुरक्षामा चुनौती थप्ने बताएका हुन् ।
धार्मिक अतिवादी संगठन र वाह्य आतंकवादी संगठनहरुबाट भारतमा विभिन्न आपराधिक घटना भएको उदाहरण बताउँदै उनीहरुले त्यसतर्फ राज्य गम्भिर हुनुपर्नेमा जोड दिए ।
कार्यक्रममा पत्रकार अनिल तिवारीले नेपालको राष्ट्रिय सुरक्षा र २६/११ मुम्बई हमलाको विषयमा कार्यपत्र प्रस्तुत गरेका थिए । कार्यक्रममा बोल्दै राष्ट्रिय एकता अभियानका अध्यक्ष विनय यादवले समाजमा आएर सेल्टर लिएर आतंकवादी गतिविधि सञ्चालन भईरहेकोमा सचेत हुन आग्रह गर्नुभयो ।
नेपाल ब्राह्मण समाजका अध्यक्ष हरि नारायण मिश्रले मुम्बई घटना भारतका लागि मात्रै नभएर विश्व समुदायका लागि चेतावनी भएको बताउनुभयो ।
गाँजालाई खुला गर्दा आतंकवादलाई सहयोग पुग्ने उहाँले दावी गर्नुभयो । जनता समाजवादी पार्टीका जिल्ला अध्यक्ष राम नरेश यादवले नेपाल भारत खुला सीमाका कारण आवत जावत सहज भएकोले जुनसुकै समयमा अप्रत्यासित घटना हुन सक्ने तर्फ सबैजना सचेत रहनुपर्ने बताउनुभयो ।
उहाँले कुनै वर्ग समुदायलाई दोष दिनुभन्दा भाईचारा, धार्मिक सहिष्णुतामा किन खलबल आईरहेको छ भन्ने विषयमा अध्ययन गर्नुपर्नेमा उहाँले जोड दिनुभयो ।
नेपाल कम्युनिष्ट पार्टी एकीकृत समाजवादीका पर्सा जिल्ला अध्यक्ष बालगोपाल थापाले आतंकवादीको कुनै जाति, धर्म र राष्ट्र नहुने बताउदै आतंकवादले राष्ट्रलाई तहसनहस पार्ने भएकोले कसैले पनि त्यसलाई प्रसय दिन नहुनेमा जोड दिनुभयो ।
पर्साका सहायक प्रमुख जिल्ला अधिकारी भीमकान्त पौडेलले एक अर्कालाई सम्मानजनक व्यवहार गर्नुपर्नेमा जोड दिदै शंकास्पद गतिविधि भईरहेको जानकारी भए प्रहरी प्रशासनलाई जानकारी गराउन आग्रह गर्नुभयो ।
