लोक आस्थाको पवित्र पर्व छठ उदाउँदो सूर्यलाई अर्घ दिएर समापन गरिदै
ट्रिब्यून न्युज
वीरगन्ज, १४ कार्तिक । हिन्दू धर्मावलम्वीहरुले मनाउने लोक आस्थाको पवित्र पर्व छठको आज अन्तिम दिन । नदि, पोखरी, तलाउ लगायतका जलाशयमा तयार पारिएको छठघाटमा ब्रतालुहरुले उदाउँदो सुर्यलाई अघ्र्य दिएर समापन गरिदै छ । निर्जल र निराहार ब्रत बसेका उनीहरुले आज उदाउँदो सुर्यलाई अघ्र्य दिएपछि छठको विधिवत रुपमा समापन हुनेछ ।
हिजो अस्ताउँदो सूर्यलाई अघ्र्य दिएपछि आज उदाउँदो सूर्यलाई अर्घ दिएर छठको विदाई गरिदै छ । छठमा कोशी भर्ने भाकल गरेकाहरुले हिजो अस्ताउँदो सूर्यलाई अर्घ दिएर घरमा फर्किएपछि छठी माताको आराधाना गर्दै कोशी भरेका छन् । कोशी भर्ने विधिमा परिवारका सबै सदस्य सामेल हुन्छन् । घाटमा नगएका परिवारका सदस्य पनि कोशी भर्ने कार्यमा सहभागी हुने गरेका छन् ।
छठ पर्वमा व्रत गरेदुःख र दरिद्रताबाट मुक्ति पाइन्छ । पारिवारिक सुख, शान्ति, कल्याण, रोगबाट मुक्ति मिल्नुको साथै मनोकांक्षा पूरा हुन्छ भन्ने जनविश्वास छ । आज सप्तमीका दिन बिहान सबेरै उठेर ब्रतालुले नुहाएर पूनः घरका पुरुष सदस्यको सहयोगमा दौरा लिएर घाटमा पुग्ने गर्छन् ।
शिरशोप्तामा पुजा गर्छन । उदाउँदो सुर्यलाई अर्घ दिएर पूजापाठ गरेपछि छठ पर्व विधिवत रुपमा समापन हुन्छ । छठको चौथो तथा अन्तिम दिनलाई भोजपुरी भाषामा ‘बिहनइया’ अथवा ‘भोरे घाट’ भनिन्छ । घर फर्किएपछि ईनार, गाई लगायत चलनचल्ती अनुसार सबैको पुजा अर्चना गरिन्छ ।
ब्रतालुले आफूभन्दा आदरणीय व्यक्तिसँग ढोगेर आर्शिवाद लिन्छन् र सानालाई आर्शिवाद दिन्छन् । त्यसपछि अदुवा, गुलियो, र तातोपानी खाएर ब्रत तोडेर मात्रै भोजन गर्ने चलन छ । तराई मधेसमा बस्ने भोजपुरी र मैथिली भाषी हिन्दुको मुख्य पर्वमा पछिल्लो समयमा अन्य समुदायको पनि आकर्षण बढ्दै गएको छ ।
