विद्यार्थी संगठनहरुद्वारा आज शैक्षिक संस्था बन्दको आह्वान
ट्रिब्यून न्युज
वीरगन्ज, २६ असार । ठाकुरराम बहुमुखी क्याम्पसको परीक्षा केन्द्र सारेको विषयलाई लिएर विद्यार्थी संगठनहरुले आज जिल्लाको शैक्षिक संस्था बन्दको आह्वान गरेका छन् । त्रिभुवन विश्वविद्यालयको आंगिक क्याम्पस ठाकुरराम बहुमुखी क्याम्पसले सञ्चालन गर्ने परीक्षाको परीक्षा केन्द्र बाराको कलैया र सिमरामा सारिएदेखि नै विद्यार्थी संगठनहरुले विरोध गर्दै आएका छन् ।
तर, क्याम्पस प्रशासनले भने आफ्नो हातमा केही नहुने भन्दै परीक्षा नियन्त्रण कार्यालयले नै परीक्षा केन्द्र तोक्ने जवाफ दिदै आएको छ । सोमबार सिमरा परीक्षा केन्द्रमा बिबिएस तेश्रो बर्षको परीक्षा दिएर फर्किने क्रममा विद्यार्थी विजय शर्माको मोटरसाईकल दुर्घटनामा परेर ज्यान गएपछि विद्यार्थीहरु थप आक्रोशित भएका छन् ।
उनीहरुले हिजो साँझ क्याम्पस प्रशासन विरुद्ध नाराबाजी गर्दै प्रदर्शन गरेका छन् । ठाकुरराम बहुमुखी क्याम्पसबाट नाराबाजी गर्दै घण्टाघरसम्म आएर प्रदर्शन गरेका थिए । परीक्षा केन्द्र नसार्न आग्रह गर्दा समेत सारेर शैक्षिक वातावरण विगार्न खोजेको र सारिएको परीक्षा केन्द्रमा परीक्षा दिएर आउने क्रममा एकजना विद्यार्थीको समेत ज्यान गएपछि त्यसको सम्पूर्ण जिम्मा क्याम्पस प्रशासनले लिनुपर्ने भन्दै विद्यार्थी संगठनहरुले हिजो प्रदर्शन गरेका हुन् ।
मंगलबार आज पर्साका सबै शैक्षिक संस्था बन्दको आह्वान गरेको हो । परीक्षामा कुनै बाधा नपर्ने गरी बन्दको आह्वान गरेको उनीहरुले जारी गरेको विज्ञप्तिमा उल्लेख गरिएको छ । विज्ञप्तिमा नेपाल विद्यार्थी संघ, समाजवादी विद्यार्थी युनियन, अनेरास्ववियु, अखिल क्रान्तिकारी, जनमत विद्यार्थी संघ लगायतका विभिन्न विद्यार्थी संगठनका प्रतिनिधिहरुले हस्ताक्षर गरेका छन् ।
