उपप्रधानमन्त्री श्रेष्ठद्वारा सिचुवान एयरलाइन्सको अवलोकन, अध्यक्षसँग भेटघाट
ट्रिब्यून न्युज
वीरगन्ज, १५ असार । जनवादी गणतन्त्र चीनको पाँचदिने भ्रमणमा रहनुभएका उपप्रधानमन्त्री एवम् गृहमन्त्री नारायणकाजी श्रेष्ठले शुक्रबार चिनियाँ कम्युनिष्ट पार्टी, सिचुवान एयरलाइन्स ग्रुपका अध्यक्ष श्र चुईबीच छेन्दुस्थित कार्यालयमा भेटवार्ता गर्नुभएको छ ।
छेन्दुमा आयोजित पश्चिमी चीन अन्तराष्ट्रिय मेलामा विशेष अतिथिको रूपमा सहभागी हुन उहाँ गत मंगलबार चीन जानुभएको थियो। त्यसक्रममा उपप्रधानमन्त्री श्रेष्ठ र चीनका उपप्रधानन्त्री ह लि फङबीच द्विपक्षीय भेटवार्ता भएको थियो । भेटघाटमा दुई देशबीचको व्यापार, लगानी, पर्यटन, ‘कनेक्टिभिटी’ जस्ता विषयमा सकारात्मक छलफल भएको थियो ।
त्यसपछि उहाँले सिचुवान प्रान्तस्थित एयरलाइन्सको अवलोकन गर्नुभएको छ। नेपाली प्रतिनिधिमण्डलसहित एयरलाइन्स पुग्नुभएका श्रेष्ठले एयरलाइन्सको अपरेसन सेन्टरको अवलोकन गर्नुभएको थियो । निर्धारित भेटघाट र अवलोकन सकेर उपप्रधानमन्त्री श्रेष्ठ आइतबार बिहान स्वदेश आइपुग्नुहुने छ।
