वीरगञ्जको पिप्रा स्थित सडक नामाकरण कार्यक्रम स्थगित
ट्रिब्यून न्युज
वीरगञ्ज, १८ माघ । वीरगन्ज महानगरपालिका वडा नम्बर १४ प्रिपा स्थित सडकको नामाकरण अनावरण समारोह स्थगित गरिएको छ । बुधबार महानगनगरले एक सूचना जारी गर्दै सडक नामाकरण अनावरण समारोह हालका लागि स्थगीत गरिएको जनाएको छ ।
महानगरपालिकाका प्रमुख प्रशासकीय अधिकृत लक्ष्मी प्रसाद पौडेलले जारी गरेको सूचनामा महानगर भित्रको ऐतिहासिक पिपरा क्षेत्रमा अवस्थित पशुपतिनाथ मन्दिर, पिपरा मठ र लक्ष्मणवा पार्कको सौन्दर्यकरण तथा संरक्षण गर्ने योजना अगाडि बढिरहेको सन्दर्भमा अनेकथरीका दुष्प्रचार गर्ने प्रयास गरिएकोमा महानगरको गम्भिर ध्यानाकर्षण भएको उल्लेख छ ।
माघ १९ गते बिहीबार वीरगनञ्ज १४ पिपरा क्षेत्रमा आयोजना हुने भनिएको सडक नामाकरण अनावरण कार्यक्रम हाललाई स्थगित गरिएको जनाइएको छ । वीरगञ्ज महानगरपालिकाले पिप्रा स्थित नवनिर्मित लिंक रोडलाई ‘महात्मा गान्धी मार्ग’ नामाकरणका लागि बिहीबार मधेस प्रदेशका मुख्यमन्त्री सरोज कुमार यादव र नेपालका लागि भारतीय राजदूत नवीन श्रीवास्तवबाट संयुक्त रुपमा नामाकरण अनावरण गराउने तय गरेको थियो ।
सडक अनावरण कार्यक्रमलाई दुष्प्रचार गरेर विवादित बनाउन खोजिएपछि भारतीय राजदूत जस्तो व्याक्तित्वलाई बोलाएर विवादित बनाउन उपयुक्त नदेखिएकाले हालका लागि उक्त कार्यक्रम स्थगित मात्र गरिएको वीरगञ्ज महानगरका मेयर राजेशमान सिंहले बताउनुभयो । उहाँले यस बारेमा सरोकारवालासँग परामर्श गरेर उक्त कार्यक्रम आयोजना गरिने पनि बताउनुभयो ।
