कर्तव्य ज्यान र ज्यान मार्ने उद्योगमा फरार अभियुक्त पक्राउ
ट्रिब्यून न्युज
वीरगन्ज, ३ पुष । जिल्ला प्रहरी कार्यालय पर्साले कर्तव्य ज्यान मुद्दा र ज्यान मार्ने उद्योगमा फरार रहेका गरी चारजनालाई पक्राउ गरेको छ । कर्तव्य ज्यान मुद्दामा फरार रहेका जीराभवानी गाउँपालिका वडा नम्बर–४ वस्ने साविर राउत गद्दीलाई प्रहरीले पक्राउ गरेको हो ।
गएको पुष ४ गते राति साविरको आफ्नै विवाहमा जन्ती गएका स्थानीय ३५ बर्षीय सलमुल्लाहा राउत गद्दीलाई कुटपिट गर्दा मृत्यु भएपछि सोही दिनदेखि उनी फरार रहेका थिए । जन्ती जाने विषयमा भएको विवादमा ३५ बर्षीय सल्मुल्लाहा राउत गद्दीलाई दुलाहा साविर र उनका काका जादुलले कुटपिट गरेका थिए ।
कुटपिटपछि स्थानीयले छुटाएर समुल्लाहालाई घर पठाएको थियो । सामान्य अवस्थामा घर गएर सुतेका उनको पुष ५ गते बिहान ३ बजेतिर मृत्यु भएको थियो । युवकको मृत्युपछि चारजना विरुद्ध प्रहरीकोमा किटानी जाहेरी परेको थियो ।
किटानी जाहेरी परेका चारजना मध्य साविर भारतमा लुकेर बसेको अवस्थामा पर्सा प्रहरीको टोलीले पक्राउ गरेको हो । अन्य तीनजना अझै फरार रहेका छन् । यस्तै जिल्ला प्रहरी कार्यालय पर्साले ज्यान मार्ने उद्योगमा फरार रहेका ३ जनालाई पक्राउ गरेको स्रोतले जनाएको छ ।
जीराभवानी गाउँपालिका वडा नम्बर १ बलुवा टोलका ज्यान मार्ने उद्योगमा फरार रहेका अभियुक्तहरुलाई इलाका प्रहरी कार्यालय पटेर्वा सुगौली र जिल्ला प्रहरी कार्यालय पर्साको अपराध अनुसन्धानको संयुक्त टोलीले तीनजनालाई पक्राउ गरेको स्रोतले जनाएको छ ।
पक्राउ पर्नेहरुको विषयमा अहिले जिल्ला प्रहरी कार्यालय पर्साले केही बोलेको छैन । पक्राउ परेकाहरुलाई अहिले जिल्लामा ल्याउदै गरेको र थप अनुसन्धान गर्न बाँकी रहेकोले अनुसन्धानपछि जानकारी गराउने प्रवक्ता प्रहरी नायव उपरीक्षक दीपक गिरीले बताउनुभयो ।
