नौ केजी ३०० ग्राम अफिम सहित एकजना पक्राउ, मोटरसाईकल चालक फरार
ट्रिब्यून न्युज
वीरगन्ज, ३ फागुन । पर्सा प्रहरीले नौ केजी ३०० ग्राम अफिम सहित एकजनालाई पक्राउ गरेको छ । प्रहरी चौकी रंगपुरबाट खटिएको नियमित चेकिङ्ग टोलीले मनवाबाट रंगपुरतर्फ आउँदै गरेको प्रदेश नं.२–०३–००७ प ६९९० नंम्बरको कालो रातो रंगको २२० सीसी को
पल्सर मोटरसाइकललाई रोकेर चेकजाँच गर्दा मोटरसाईकलको पछाडि बस्ने मकवानपुर जिल्ला राक्सीराङ गाउँपालिका वडा नं.–४ बस्ने वर्ष ३० को सुजन मोक्तानको साथबाट नौ किलो तीनसय ग्राम अफिम बरामद गरेको जिल्ला प्रहरी कार्यालय पर्साका प्रवक्ता प्रहरी नायव उपरीक्षक ओमप्रकाश खनालले जानकारी दिनुभयो ।
मोक्तानले भिरेको कालो ब्यागभित्र सेतो प्लाष्टिकको झोलामा लागू औषध अफिम जस्तो देखिने लेदो पदार्थ ९ के.जी. ३०० ग्राम फेला परेकोपछि मोटरसाईकल सहित उनलाई नियन्त्रणमा लिएर लागूऔषध सम्बन्धी कसुरमा अनुसन्धान अगाडि बढाइएको प्रहरी नायव उपरीक्षक खनालले बताउनुभयो ।
मोटरसाइकल चालक मोटरसाईकल छोडेर फरार रहेकोले र चालकको पहिचान भैसकेको हुँदा खोजतलास जारी रहेको पर्सा प्रहरीले जनाएको छ ।
