महिलाहरु उद्यम, व्यापारक्षेत्रमा अग्रसर भएको देख्दा खुशी लाग्छ : मेयर सिंह
ट्रिब्यून न्युज
वीरगन्ज, ७ साउन । वीरगञ्ज महानगरपालिकाका मेयर राजेशमान सिंहले देशकै आर्थिक नगरीको रुपमा चिनिने वीरगञ्जमा महिलाहरु पनि उद्यम, व्यापार क्षेत्रतर्फ अग्रसर भएको पाउँदा खुसी लागेको बताउनु भएको छ । उहाँले प्रतिषपर्धाले भरिएको अहिलेको युगमा महिलाहरुद्वारा उत्पादीत वस्तुहरु केवल कोठ वा पसल भित्रसम्म सीमित रहेको भन्दै वीरगञ्ज महानगरपालिकाले प्रत्येक महिनाको अन्तिममा आयोजना गर्ने रात्रि बजारमा विक्री वितरणका लागि राख्न आग्रह गर्नुभयो ।
वीरगञ्जका महिलाहरुद्वारा संचालित वुमन क्रिएसन नामक संस्थाले अयोजना गरेको ‘समर फेयर २०२३’ को अवलोकन गर्दै मेयर सिंहले विश्वभरका उद्यमीहरुले प्रविधिको भरपूर प्रयोग गरेर अन्तराष्ट्रियस्तरमा आफ्नो व्यापार व्यवसायबाट मनग्य आमदानी गरिरहेको भन्दै डिजीटल मार्केटिङग गर्न महिला उद्यमीहरुलाई सुझाव दिनुभयो ।
उहाँले महिलालाई आत्मनिर्भर बनाउने उदेश्यले वीरगञ्ज महानगरपालिकाले क्षमता अभिवृद्धि तालिमको आयोजना गरिरहेको पनि जानकारी दिनुभयो । नगर प्रमुख सिंहले देशको राष्ट्रपति पदमा समेत महिलाले प्रतिनिधित्व गरिसकेको हुँदा उद्यम व्यापार क्षेत्रमा अगाडी बढ्नुपर्ने कुरामा जोड दिँदै त्यसका लागि महानगरपालिकाले भरपूर सहयोग गर्ने प्रतिबद्धता समेत व्यक्त गर्नुभयो ।
यस्तै वुमन क्रिएशनकी अध्यक्ष हेमा अग्रवालले महिलाहरु केवल घरको कामकाजमा मात्र सिमित नभई घर बाहिरका जिम्मेवारीहरु समेत समाल्हन सक्ने बताउनुभयो । उहाँले महिलाहरु पुरुष सरह नेतृत्व गर्ने, उद्योग, व्यापार संचालन गर्ने र निर्णय गर्न सक्ने क्षमता भएको हुँदा पनि अवसर नपाउने गरेको गुनासो गर्नुभयो ।
अध्यक्ष अग्रवालले कुनै पनि उद्योग वा व्यवसाय स्थापनाका लागि विभिन्न स्रोत–साधन तथा सुविधाहरूको आवश्यक पर्ने हुँदा सम्पूर्ण मात्रामा महिला उद्यमी आफंैले व्यवस्था गर्न नसक्ने भन्दै यस्तो अवस्थामा उनीहरूलाई सहयोग गर्न सरोकारवाला निकायदेखि महिलासंग आबद्ध संस्थाहरु अघी बढ्नुपर्नेमा बताउनुभयो । वीरगञ्जका मेयर राजेशमान सिंहले दिएको सुझावलाई मन्न गरेर अघी बढ्ने बताउनुभयो ।
यस्तै वुमन क्रिएसनकी उपाध्यक्ष सुमोना बेर्नजीले अहिले पनि समाजले महिलालाई घर–परिवारको रेखदेख गर्ने रुपमा मात्र लिएको बताउदै यस्तो मानसिकतालाई चिर्न वुमन क्रिएसनले कार्यक्रमको आयोजना गर्दै आएको बताउनुभयो । वीरगञ्जमा थुप्रै महिला उद्यमीहरु भएपनि उनीहरुद्वारा उत्पादीत वस्तुको बजारीकरण हुन नसक्दा पछि परेको क्रिएसनकी उापध्यक्ष बेर्नजीको भनाई छ ।
सोही कुरालाई ध्यानमा राखी आफूहरुले समर फेयरको आयोजना गरेको र यसले महिला उद्यमीहरुलाई आफ्नो क्षमता देखाउनुका साथै ग्राहकसंग सोझै सम्पर्क गर्ने अवसर प्रदान गरेको बताउनुभयो । फेयरमा खाने कुरा, लत्ताकपडा, सजावटका सामाग्री लगायत गरी ५० वटा स्टल राखिएको छ ।
२००२ मा ४ जना महिलाबाट सञ्चालन भएको वुमन क्रिएसन संसथामा हाल ५० जना सदस्य रहेका छन् । महिला उद्यमीहरुको क्षमता अभिवृद्धि र आत्मविश्वास बढाउने उदेश्यले शनिबार वीरगञ्जमा ‘समर फेयर २०२३’ को आयोजना गरिएको हो । मेलामा महिलाहरु आफैले उत्पादन गरेको विभिन्न बस्तुहरुको प्रदर्शन गरिनुका साथै मनोरञ्जनका लागि विभिन्न खेलहरुको व्यवस्था गरिएको थियो ।
कार्यक्रममा वुमन्स क्रिएसनकी नेन्सी अग्रवाल, अफ्साना खातुन, नेपाली युवा उद्यमी मञ्च वीरगञ्जका पूर्व अध्यक्ष अनुप अग्रवाल, उद्यमी सञ्जय अग्रवाल, महिला उद्यमीहरु, सञ्चारकर्मी आशु कुमार सर्राफलगायतको उपस्थिति रहेको थियो ।
