भारतको ऋषिकेशमा दुर्घटनामा परी घाईते भएकाहरुलाई रेलमार्फत ल्याईदै
ट्रिब्यून न्युज
वीरगन्ज, १८ जेठ । भारतको ऋषिकेष नजिक सडक दुर्घटनामा परेकाहरुलाई रेलमार्फत रक्सोलसम्म ल्याईदै छ । वीरगन्ज महानगरपालिका वडा नम्बर १ छपकैयाका नौजनाको टोली केदारनाथ दर्शन गर्न भारत गएका थिए ।
जाने बेलामा रेलमा गएका उनीहरु केदारनाथ दर्शन गरेपछि बलेरो गाडी रिजर्ब गरेर फर्किदै गर्दा केदारनाथबाट ऋषिकेष आउने बाटोमा बुधबार दुर्घटनामा परेको हो । तीब्रगतिमा रहेको बलेरोले अगाडिको सवारीलाई उछिन्न खोज्दा अनियन्त्रीत भएर दुर्घटना भएको बताईएको छ ।
दुर्घटनामा बलेरो चालक भारतीय नागरिक र वीरगन्ज महानगरपालिका वडा नम्बर १ छपकैयाका युवा विवेक कलवारको मृत्यु भएको बताईएको छ । मृतक विवेक स्थानीय तह निर्वाचनमा नेपाली कांग्रेस को तर्फबाट वीरगन्ज महानगरपालिका वडा नम्बर १ का वडा अध्यक्षका प्रत्यासी ओमप्रकाश गुप्ताका छोरा हुन् । दुर्घटनामा केदारनाथ दर्शनका लागि गएका ९ जना मध्य घाईते दुईजनाको अवस्था गम्भीर रहेको छ ।
६ जनाको अवस्था भने मध्यम रहेको दुर्घटनाको जानकारी पाएर गएका छपकैयाका एकजनाले बताए । मृतकको शव र घाईतहरुलाई ऋषिकेषबाट रेलको एसी बगी रिजर्भ गरेर ल्याउन लागिएको उनले बताए । दुर्घटनाको जानकारी पाएपछि वीरगन्ज महानगरपालिकाका नगर प्रमुख राजेशमान सिंहले दुख व्यक्त गर्नु भएको छ ।
उहाँले तीर्थाटनमा गएका वीरगन्ज महानगरको छपकैयावासी तीर्थालुहरु सडक दुर्घटनामा परेको खबरले आफूलाई दुखी तुल्याएको भन्दै मृतकको शव नेपाल ल्याउन र घाईतेको उपचारका लागि आवश्यक पहल गरिरहेको बताउनुभयो । उहाँले वीरगन्ज स्थित भारतीय महावाणिज्यदूतावास मार्फत मृतकको शव ल्याउने र घाईतेहरुको उपचारको लागि पहल गरिरहेको जानकारी बताउनुभयो ।
