मिनी ट्रकमा ल्याउदै गरेको ३६३ केजी गाँजा बरामद
ट्रिब्यून न्युज
वीरगन्ज, २७ मंसिर । पर्साको ठोरी गाउँपालिकाबाट मिनीट्रकबाट प्रहरीले गाँजा बरामद गरेको छ । चितवनबाट ठोरीको विजयवस्तीतर्फ आउदै गरेको ना ४ ख ६५५५ नम्बरको मिनी ट्रक ठोरीको ठुट्टे खोला अगाडि रोकेर खानतलासी गर्ने क्रममा २२ पोकामा रहेको ३६३ केजी प्रतिबन्धित लागू औषध गाँजा बरामद गरेको इलाका प्रहरी कार्यालय ठोरीले जनाएको छ ।
प्रहरीले पछ्याउन थालेपछि मिनीट्रकका चालक भने फरार भएका छन् । ट्रकबाट प्रहरीले ३६३ केजी गाँजा बरामद गरेको छ । सोमबार राती इलाका प्रहरी कार्यालय ठोरी र सशस्त्र प्रहरी ठोरीको संयुक्त गस्तीले बरामद गरेको २२ पोका गाँजा जिल्ला प्रहरी कार्यालय लिएर आउने क्रममा प्रहरी निरीक्षकको सवारी दुर्घटनामा परेको छ ।
सवारी दुर्घटना हुदा प्रहरी निरीक्षक शंकर श्रेष्ठ सहित २ जना घाइते भएका छन् । बीरगंज ठोरी हुलाकी सडक खण्ड अन्तरगतको पटेर्वा सुगौली गाउँपालिकामा पर्ने मनिहर्वा नजिकै सवारी दुर्घटना हुदा प्रहरी निरीक्षक श्रेष्ठ र प्रहरी जवान मनोज घर्ती घाइते भएको इलाका प्रहरी कार्यालय ठोरीले जनाएको छ । घाइते प्रहरीको नारायणी अस्पतालमा उपचार भईरहेको जिल्ला प्रहरी कार्यालय पर्साले जनाएको छ ।
