वीरगन्जका मतदाताको मत खेर नफाल्नका लागि नै मेरो उम्मेदवारी : द्विवेदी
ट्रिब्यून न्युज
वीरगन्ज, ११ कार्तिक । मंसिर ४ गते हुने प्रतिनिधिसभा तथा प्रदेशसभा निर्वाचनका लागि उम्मेदवारहरुले मतदाताको घर घरमा गएर मत माग्ने कामलाई निरन्तरता दिएका छन् । प्रतिनिधिसभा सदस्यका लागि पर्सा क्षेत्र नम्बर १ बाट स्वतन्त्र उम्मेदवारी दिनुभएका अजय द्विवेदीले पनि मतदाताहरुसँग निरन्तर भेटघाट गर्नुभएको छ ।
उहाँले शुक्रबार पर्साको क्षेत्र नम्बर अन्तर्गत पर्ने वीरगन्ज महानगरपालिका वडा नम्बर २३ प्रसौनीमा मतदाताहरुलाई भेट्नु भएको छ । भेटका क्रममा उहाँले पर्साको विकासका लागि आफू स्वतन्त्र रुपमा उम्मेदवारी दिएको बताउनुभयो ।
दलका नेताहरु नेतावाद, गुटवाद र व्यक्तिवाद भएको भन्दै अब दलका उम्मेदवारहरुले जितेमा कार्यकर्ता भर्तीकेन्द्र मात्रै बनाएर विकास भने नगर्ने बताउनुभयो । उहाँले दलहरुले आफू आफू जित्नका लागि जनताको मतलाई बन्धक बनाउन खोजेकोले नै जनमतका लागि आफ्नो उम्मेदवारी रहेको बताउनुभयो ।
पर्सामा वृद्धदेखि युवासम्मका मतदाताहरुले वैकल्पिक उम्मेदवार खोजीरहेकाले वीरगन्जका मतदाताहरुको मत खेर नजाओस भनेर नै आफूले स्वतन्त्र उम्मेदवारी दिएको प्रष्ट पार्नुभयो । मतादाता भेटघाट कार्यक्रममा द्विवेदीलाई अरुले जस्तो विकासको नाममा भ्रष्टाचार नगर्न र पर्साको नमूना विकास गर्न सुझाव दिएका थिए ।
