रेडक्रस सोसाईटी पर्साको दोश्रो साधारणसभा सम्पन्न
ट्रिब्यून न्युज
वीरगन्ज । नेपाल रेडक्रस सोसाइटी पर्सा शाखाको दोस्रो जिल्ला बार्सिक साधारण सभा बुधबार सम्पन्न भएको छ । रेडक्रस पर्साका सभापति बिरेन्द्र राज कडेंलको अध्यक्षतामा भएको कार्यक्रममा प्रमुख अतिथि जिल्ला समन्वय समिति पर्साका प्रमुख नेक महम्मद अन्सारीले उदघाटन सत्रको उदघाटन गर्नुभएको थियो ।
कार्यक्रममा बिशिष्ट अतिथि नेपाल रेडक्रस सोसाईटी मधेस प्रदेशका अध्यक्ष फुलमहम्म मियाँ, अतिथि बिरगंज महानगरपालिका प्रमुख प्रशासकीय अधिकृत निश्चल राज पाण्डे लगायतले शुभकामना मन्तव्य राख्नु भएको थियो । यसैबीच उदघाटन सत्रमा विभिन्न क्षेत्रमा सहयोग गर्ने संस्था तथा ब्यक्तिलाई सम्मान गरिएको थियो ।
रक्तसञ्चार केन्द्रको भवन निर्माणका लागि जग्गा उपलब्ध गराएको र नगद २५ लाख सहयोग गर्ने वीरगन्ज महानगरपालिकालाई सम्मान गरिएको थियो । त्यसैगरी यसबर्ष सबैभन्दा बढी रक्तदान गर्ने रेडक्रसकर्मी तथा जसपा नेपाल पर्साका सचिव तबरेज अहमदलाई पुरस्कार प्रदान गरिएको थियो ।
साधारणसभामा मन्त्री शैलेन्द्र चौरसियाले प्रस्तुत गर्नुभएको प्रगति प्रतिवेदन र कोषाध्यक्ष महन्त यादवले प्रस्तुत गर्नु भएको आर्थिक प्रतिवेदन सहित बन्दशत्रमा विभिन्न प्रस्ताव पारित गरेको मन्त्री शैलेन्द्र चौरसियाले जानकारी गराउनु भयो । कार्यक्रम संचालन जिल्ला सदस्य शिवनाथ यादवले गर्नुभएको थियो ।
