टाटा सूमो र लागू औषध सहित एजकना पक्राउ
ट्रिब्यून न्युज
वीरगन्ज, १२ बैशाख । प्रहरीले टाटा सूमो र प्रतिबन्धित लागू औषध सहित एकजनालाई पक्राउ गरेको छ ।
वडा प्रहरी कार्यालय श्रीपुरका प्रहरी निरीक्षक आशुतोष बहादुर शाहीको नेतृत्वमा खटिएको प्रहरीको टोलीले वीरगञ्ज महानगरपालिका वडा नं.१२ स्थित हरियाली रेष्टुरेन्ट अगाडी बाईपास सडक खण्डबाट लागू औषध सहित वीरगञ्ज महानगरपालिका वडा नं.१६ बस्नेबर्ष २५ का बब्लु पाठकलाई पक्राउ गरेको हो ।
भारतबाट वीरगञ्जतर्फ आईरहेको ना. १ ज. २०३७ नं. को टाटा सूमोलाई रोकेर चेकजाँचगर्दा १४ पोकामा रहेको फेनारगन १४०० एम्पुल, डाईजेल्याब १४०० एम्पुल र नुरफिन १४०० एम्पुल गरी जम्मा ४२०० एम्पुल प्रतिबन्धित लागु औषध फेला परेको जिल्ला प्रहरी कार्यालय पर्साका प्रवक्ता प्रहरी नायव उपरीक्षक दिपक गिरीले जानकारी दिनुभयो ।
गाडीको ईन्जिन माथिको बर्नटको दुबैपट्टीको भागमा कालो पलाष्टिकमा पोका बनाएर लुकाई छिपाइ राखेको अवस्थामा लागूऔषध फेला परेको प्रहरी नायव उपरीक्षक गिरीले बताउनुभयो ।
टाटा सूमो र लागूऔषध सहित पक्राउ परेका बब्लुलाई पर्सा जिल्ला अदालतबाट ७ दिनको म्याद थपगरी अनुसन्धान अगाडि बढाईएको जिल्ला प्रहरी कार्यालय पर्साले जनाएको छ ।
