स्व.नरेश स्मृति पत्रकारिता पुरस्कार राजेन्द्र सिंहलाई
ट्रिब्यून न्युज
वीरगंज, १४ चैत्र । स्वर्गीय नरेश सर्राफ स्मृति क्रियाशिल पत्रकारिता पुरस्कारबाट वीरगंजका सञ्चारकर्मी राजेन्द्र सिंहलाई पुरस्कृत गरिएको छ । नेपाल पत्रकार महासंघ पर्साले स्थापना गरेको पुरस्कार महासंघको ६८ औं स्थापन दिवसको अवसरमा बिहीबार पुरस्कृत गरिएको हो ।
नेपाल पत्रकार महासंघ पर्साका सदस्य समेत रहेका वीरगन्जका युवा पत्रकार नरेश सर्राफको गएको मंसिर १५ गते ह्दयघातका कारण निधन भएको थियो । उहाँकै स्मृतिमा अक्षय कोष खडा गरेर २० हजार रुपैयाँ राशीको पुरस्कारबाट एकजना पत्रकारलाई पुरस्कृत गर्ने निर्णय गरेको थियो । सोही निर्णय अनुसार बिहीबार सिंहलाई पुरस्कृत गरिएको हो ।
सिंहलाई पर्साका प्रमुख जिल्ला अधिकारी हिरालाल रेग्मीले सम्मानपत्र र २० हजार रकम बराबारको चेक हस्तान्तरण गर्नु भएको हो । युवा सञ्चारकर्मी स्वर्गीय नरेश सर्राफको स्मृतिमा स्थापना गरिएको पुरस्कार पहिलो बर्षदेखि वितरण गर्न थालिएको हो । महासंघ पर्सा शाखाले प्रत्येक वर्ष ४० वर्ष उमेर नकटेका सञ्चारकर्मीलाई पुरस्कार वितरण गरिने महासंघका अध्यक्ष अनुप तिवारीले जानकारी दिनुभयो ।
पुरस्कृत सिंह पब्लिक एफ.एम., एन्युज टेलिभिजन, रेडियो नेपाल लगायतका सञ्चार माध्यममा कार्यरत रहनुभएको छ । महासंघका अध्यक्ष अनुप तिवारीको अध्यक्षतामा कार्यक्रम सम्पन्न भएको हो ।
