नेपाल उद्योग वाणिज्य संघ मधेस प्रदेशद्वारा ‘फेरी भेटौंला’ कार्यक्रमको आयोजना
ट्रिब्यून न्युज
वीरगन्ज, ९ माघ । पर्साका प्रमुख जिल्ला अधिकारी उमेश ढकालले पर्सामा आफ्नो कार्यकालमा असुरक्षाको महशुस हुन नदिएको दावी गर्नुभएको छ । सरुवा भएर पर्सामा आउँदा सुरक्षा चुनौती पो छ कि भन्ने चिन्ता लागेपनि त्यसको उचित व्यवस्थापन गर्न सकेकोले सुरक्षा व्यावस्था चुस्त राख्न सकिएको बताउनुभयो ।
उहाँको गृह मंत्रालय, काठमाण्डौमा सरुवा भएको छ । प्रजिअ ढकालको सम्मानमा नेपाल उद्योग वाणिज्य संघ मधेस प्रदेश समितिले वीरगञ्जमा आयोजना गरेको ‘फेरि भेटौंला’ कार्यक्रममा बोल्दै उहाँले संघीयताको अभ्यासले केही अधिकार कटौती भएर कार्य सम्पादनमा समस्या देखिएको समेत बताउनुभयो ।
‘वीरगञ्जमा व्यवसायिक वातावरण बनाउनुपर्छ भन्ने लागेको थियो । त्यहि अनुसार सुरक्षा व्यवस्थापनका लागि समन्वय गरेको थिँए । सफल नै रह्यो ।’ उहाँले भन्नुभयो । पर्सामा आउने प्रमुख जिल्ला अधिकारीको सीमावर्ती समकक्षीहरूसँगको समन्वय र व्यवहार सदभावपूर्ण हुनुपर्ने उहाँको भनाई छ ।
सुशासनको क्षेत्रमा धेरै काम गरेपनि अझै सुधार गर्नुपर्ने पक्ष बाँकी रहेको उहाँको तर्क छ । जिल्ला प्रहरी कार्यालय पर्साका प्रहरी उपरीक्षक कोमल शाहले वीरगञ्जका उद्योगी व्यवसायीलाई ढुक्क भएर व्यापार व्यवसाय सञ्चालन गर्न आग्रह गर्नुभएको छ ।
उद्योगी व्यवसायीको व्यक्तिगत र व्यवसायिक सुरक्षाका लागि नेपाल प्रहरी जिम्मेवार रहेको उहाँको भनाई छ । कार्यक्रममा उद्योगी व्यवसायीहरुले पर्साले १६ महिनासम्म प्रशासक मात्रै नभई कुशल अभिभावक पाएको भन्दै प्रशंसा गरेका थिए ।
नेपाल उद्योग वाणिज्य महासंघ मधेस प्रदेश समिति अध्यक्ष गणेश लाठले गृह मन्त्रालयमा वीरगञ्जको शिष्टाचार महापालको भूमिकामा जस्तै काम गरिदिन आग्रह गर्नुभयो । कार्यक्रममा वीरगन्ज उद्योग वाणिज्य संघका पूर्व अध्यक्षहरु अशोक टेमानी, अशोक वैद, प्रदीप केडिया लगायतले आ–आफ्नो धारणा व्यक्त गर्नुभएको थियो ।
कार्यक्रमको सहजीकरण अनुप अग्रवालले गर्नुभएको थियो भने, धन्यवाद ज्ञापन सञ्जय अग्रवालले गर्नुभएको थियो ।
