मधेस प्रदेश मिडिया काउन्सिलका अध्यक्ष भट्टराईको निधन
ट्रिब्यून न्युज
वीरगन्ज, १७ मंसिर । मधेस प्रदेश मिडिया कान्सिलका अध्यक्ष शिवहरी भट्टराईको निधन भएको छ । नेपाल पत्रकार महासंघ सप्तरीका संस्थापक सभापति पूर्व केन्द्रीय उपाध्यक्ष समेत रहनुभएका भट्टराईको निधन भएको नेपाल पत्रकार महासंघका केन्द्रीय सदस्य केसी लामिछानेले जानकारी दिनुभयो ।
नेपाल पत्रकार महासंघ सर्लाही शाखाको ११ औं साधारणसभाका लागि सर्लाहीमा रहनुभएका भट्टराई राति कोठामा सुतेको अवस्थामा मृत भेटिनु भएको हो । केन्द्रीय सदस्य लामिछानेका अनुसार पत्रकार महासंघ सर्लाही शाखाको साधारणसभा साधारणसभा भेला भएका सबै पत्रकारहरुसँग रमाईलो गरेपछि अबेर राति कोठामा सुत्न जानु भएको थियो ।
बिहान ढिलोसम्म उहाँ नउठेपछि ढोका ढक्ढकाउन जाँदा सुनसान पाएपछि कोठाको भित्रबाट बन्द गरिएको ढोका खोलेर हेर्दा उहाँ मृत अवस्थामा भेटिनु भएको थियो । वेडबाट खुट्टा तल झारेको, शरीर बेडमै भएको र दायाँबायाँ औषधिहरु छरिएको अवस्थामा उहाँ मृत भेटिनु भएको थियो ।
सर्लाहीको लालबन्दी स्थित पथ्थरकोटमा रहेको होटल होलिडे रिसोर्टमा आयोजना गरिएको महासंघ सर्लाही शाखाको साधारणसभामा सहभागी हुन पत्रकारहरु सर्लाहीमा भेला भएका छन् । उहाँको निधनपछि साधारणसभा पनि स्थगित गरिएको छ ।
