बारामा हतियार सहित एक युवक पक्राउ
ट्रिब्यून न्युज
वीरगन्ज, २६ असोज । जिल्ला प्रहरी कार्यालय बाराले हतियार सहित एकजनालाई पक्राउ गरेको छ । पक्राउ पर्नेमा बाराको पचरौता नगरपालिका वडा नम्बर ८ बाजेपट्टी बस्ने २९ बर्षीय अमर राय यादवलाई घरेलु कटुवा पेस्ता र चक्कु सहित पक्राउ गरेको हो ।
सीमावर्ती भारतीय जिल्लाहरूबाट अवैध सानो हातहतियार नेपाल भित्रिन नदिन सिमावर्ती इलाकामा जिल्ला प्रहरी कार्यालयबाट परिचालन भएका प्रहरी टोलीले प्राप्त गरेको गोप्य सूचनाको आधारमा मंगलबार साँझ ५ बजेको समयमा बाराको पचरौता नगरपालिका वडा नं.९ तियर खोला पुलबाट उनलाई पक्राउ गरेको बाराका प्रहरी उपरीक्षक होविन्द्र वोगटीले जानकारी दिनुभयो ।
यादवले बोकेको प्लाष्टिकको बोराको झोला भित्र लुकाई छिपाई राखेको अवस्थामा अवैध घरेलु कटुवा पेस्तोल १ थान र एके–४७सीसीसीपी कम्पनीको चक्कु १ थान उनको साथबाट बरामद भएको प्रहरी उपरीक्षक वोगटीले बताउनुभयो ।
हतियार सहित पक्राउ परेका उनलाई बारा जिल्ला अदालतबाट पहिलो पटक पाँच दिनको म्याद थपको अनुमति लिएर अनुसन्धान भइरहेको प्रहरी उपरीक्षक वोगटीले बताउनुभयो ।
