पारसले सन्यास लिएको घोषणा
ट्रिब्यून न्युज
वीरगन्ज, १९ साउन । नेपाली क्रिकेटका पूर्व कप्तान पारस खड्काले अन्तराष्ट्रिय क्रिकेटबाट सन्यास लिने घोषणा गर्नुभएको छ । नेपाली क्रिकेटलाई उचाईमा पुर्याउन ठूलो भूमिका खेलेका पूर्व कप्तान पारस खड्काले अन्तराष्ट्रिय क्रिकेटबाट सन्यासको घोषणा गर्नुभएको हो ।
आफ्नो क्रिकेट खेल जीवनको स्मरण गर्नुहुदै उहाँले आज सामाजिक सञ्जालमार्फत नेपाली समर्थक र सरोकारवालाप्रति कृतज्ञता व्यक्त गर्दै नेपालका लागि खेल्नु नै आफ्नो जीवनको सर्वश्रेष्ठ उपलव्धि भएको बताउनु भएको छ । सन् २००२ मा १५ बर्षको उमेरदेखि पारसले क्रिकेट यात्रा थालेका थिए ।
क्रिकेटरका रुपमा आफूले मन, वचन र कर्मले कर्तव्यनिष्ठ भएर देश र नेपाली क्रिकेट जगतको उत्थानका लागि सदैब भूमिका निर्वाह गरेको पारसले उल्लेख गर्नुभएको छ । सबैले ईमान्दारीपूर्वक मिलेर काम गरे नेपाली क्रिकेटलाई नयाँ उचाईमा पुर्याउन सकिने पारसले बताउनु भएको छ । आफ्नो दुईदशकको खेल यात्रा अविश्मरणीय रहने पनि बताउनु भएको छ ।
