पर्सामा काठ तस्कर र प्रहरीबीच भिडन्त, तीन राउण्ड हवाई फायर
ट्रिब्यून न्युज
वीरगन्ज, २८ भदौ । पर्सामा काठ तस्कर र प्रहरी बिच भिडन्त भएको छ । झडपका क्रममा प्रहरीले तीन राउण्ड हवाइ फायर पनि गरेको छ । जिल्ला प्रहरी कार्यालयबाट खटिएको प्रहरी टोली र काठ तस्करबीच सोमबार बिहान ४ बजे भिडन्त भएको हो ।
पटेर्वासुगौली गाँउपालिकाको फरहादवा नजिक पर्ने जङगलबाट सालको गोलिया काठ मोटरसाइकलमा राखेर ल्याउदै गरेका चार वटा मोटरसाइकलमा सवार ८ जना तस्करलाइ प्रहरीले रोक्ने क्रममा भिडन्त भएको हो ।
५ जनाको प्रहरी टोलीले रोक्न खोज्दा ८ जनाको संख्यामा रहेका काठ तस्करहरुले प्रहरी माथि नै आक्रमण गर्न जाइ लागेपछि आत्मरक्षाका लागि प्रहरीले ३ राउण्ड हवाइ फायर गर्नु परेको प्रहरी नायव उपरिक्षक खनालले बताउनुभयो । प्रहरीले हवाइ फायर गरेपछि तस्करहरु दुइवटा मोटरसाइकल र काठ छाडेर भागेको खनालले बताउनुभयो ।
घटनास्थलबाट काठ तस्करीमा प्रयोग भएका दुईवटा मोटरसाइकल र दुईवटा ठूला गोलीया काठ बरामद गरिएको प्रहरी नायव उपरीक्षक खनालले जानकारी दिनुभयो ।
