एभिसी भलिबलका विजेता नेपाली टोलीलाई उपराष्ट्रपतिको बधाई
ट्रिब्यून न्युज
वीरगन्ज, १४ पुस । उपराष्ट्रपति नन्द बहादुर पुनले नेपाली महिला भलिबल टोलीलाई बधाई दिनुभएको छ । नेपाली राष्ट्रिय महिला भलिबल टिमले बंगलादेशको ढाकामा सम्पन्न एसियन भलिबल कन्फेडेरेसन (एभिसी), सेन्ट्रल जोन सिनियर महिला भलिबल च्याम्पियनसीपको फाइनलमा उज्वेकिस्तानलाई पराजित गरेर विजयी भएकोमा उपराष्ट्रपनि पुनले बधाई दिनु भएको हो ।
सेन्ट्रल जोन सिनियर महिला भलिबल च्याम्पियनसीपको उपाधीको रक्षा गर्दै किर्तिमान कायम गर्नु राष्ट्रकै गौरव र प्रतिस्ठा उच्चो हुनु रहेको भन्दै नेपाली महिला भलिबल टिमले किर्तिमान कायम गरेको गौरवपूर्ण अवसरमा अत्यन्त हर्षित भएको पनि बताउनु भएको छ ।
उपराष्ट्रपतिको सचिवालयले जारीको विज्ञप्तिमा भनिएको छ, “खुशीयालीको सुखद अवसरमा राष्ट्रको गरिमा बढाउनुका साथै नेपाल र नेपालीको शीर उचो बनाउनुहुने राष्ट्रिय महिला भलिबल टिमका प्रमुख प्रशिक्षक जगदीश भट्ट, कप्तान अरुणा शाही, सम्पूर्ण खेलाडीहरु, टिम म्यानेजर तथा नेपाल भलिबल संघका पदाधिकारीहरुमा बधाई दिन चाहन्छु । राष्ट्रका लागि यो ऐतिहासिक सफलता दिलाउने प्रशिक्षक तथा खेलाडीहरुमा धन्यवादसहित उच्च सम्मान व्यक्त गर्दछु ।”
भलिबल राष्ट्रिय खेलमात्रै नभइ हिमाल, पहाड र तराईका टोल–टोलमा खेल्न सकिने र नेपालका सबै भूगोललाई जोड्ने सबैभन्दा लोकप्रिय खेल पनि रहेको र नेपाली भलिबलको ४३ वर्ष लामो अन्तर्राष्ट्रिय यात्रामा राष्ट्रिय महिला भलिबल टिमले राष्ट्रलाई दोस्रो पटक दिलाएको यो अन्तर्राष्ट्रिय उपाधी अभूतपूर्व, अनुपम एवम् प्रशंसनीय रहेको बताउनु भएको छ ।
यसबाट नेपाली महिला राष्ट्रिय भलिबलले टिमले ठूलो फड्को मारेको प्रमाणित भएको साथै यो अपार सफलताबाट देशभित्र भलिबलको लोकप्रियता अझै बढेर जानुको साथै भविष्यमा हुने अन्तर्राष्ट्रिय प्रतियोगिताहरुमा नेपाली खेलाडीहरु उच्च मनोबालका साथ मैदानमा उत्रने र यी भन्दा ठूला सफलताहरु हासिल गर्नेमा म विश्वस्त रहेको पनि बताउनु भएको छ ।
यस्तै प्रतियोगिताको पुरुषतर्फको खेलमा नेपाली राष्ट्रिय पुरुष भलिबल टिमले गरेको प्रदर्शनको पनि प्रशंसा गर्नुभएको छ । देशभक्ति भावले ओतप्रोत नेपाली खेलाडीहरुले आगामी दिनमासमेत राष्ट्रप्रतिको प्रेम र समर्पणलाई अटल राख्दै देशको
महिमा र गरिमालाई विश्व जगतमा अझै फैलाउने कुरामा विश्वस्त जनाउदै नेपाली भलिबल र समग्र खेलकूद क्षेत्रको विकासका लागि मेरो सदा सर्वदा साथ रहने पनि बताउनु भएको छ ।
