कोरोना संक्रमणका कारण वीरगन्जमा थप एकको मृत्यु
ट्रिब्यून न्युज
वीरगन्ज, २२ बैशाख । कोरोना भाईरस संक्रमणका कारण वीरगन्जको नारायणी अस्पतालमा मंगलबार राति थप एकजनाको मृत्यु भएको छ । वीरगन्ज महानगरपालिका आदर्शनगर ठेगाना उल्लेख भएका ४० बर्षीय पुरुषको कोरोना संक्रमणका कारण मृत्यु भएको नारायणी अस्पतालका कोभिड कोअर्डिनेटर डाक्टर सरोज रोशन दासले जानकारी दिनुभयो ।
बैशाख १३ गते कोरोना रिपोर्ट पोजेटिभ आएको उनलाई बैशाख १६ गते बिहीबार अस्पताल भर्ना गरिएको थियो । उनको बैशाख २१ गते मंगलबार राति मृत्यु भएको डाक्टर दासको भनाई छ । जिल्ला प्रशासन कार्यालय पर्साका कोभिड सम्पर्क व्यक्ति विनय कुमार श्रीवास्तवका अनुसार कोरोनाको दोश्रो लहर शुरु भए यता चैत ३१ देखि बैशाख २१ गते मंगलबार बिहान सम्म वीरगन्जमा कोरोनाले ३६ जनाको मृत्यु भएको छ ।
मंगलबार राति एकजनाको मृत्यु भएपछि मृत्यु हुनेको संख्या ३७ पुगेको छ । ती मध्य वीरगन्जको नारायणी अस्पतालमा २९ जनाको, नारायणी बयोधा अस्पतालमा ४ जना, नेशनल मेडिकल कलेजको कोरोना अस्पतालमा ३ जना र गण्डक अस्पतालमा १ जनाको मृत्यु भएको हो । मृतक ३७ जना मध्ये पर्साका २६ जना, बाराका ७, सर्लाहीका २ जना, रौतहटका १ जना र एक जना भारतीय नागरिक रहेका छन् ।
