६ वटा प्रदेशले आज बजेट प्रस्तुत गर्दै, कोशीको अध्यादेश मार्फत बजेट
ट्रिब्यून न्युज
वीरगन्ज, १ असार । संवैधानिक प्रावधान अनुसार ६ वटा प्रदेश सरकारहरुले आर्थिक वर्ष ०८०–०८१ को बजेट आज सार्वजनिक गर्दैछन् । संविधानतः सङ्घ सरकारले जेठ १५ मा र प्रदेश सरकारले असार १ मा बजेट सार्वजनिक गर्ने व्यवस्था छ । यहीअनुरूप प्रदेश सरकारले आज बजेट सार्वजनिक गर्न लागेका हुन् ।
प्रदेश सरकारहरूले आ–आफ्नो प्रदेशअनुरूप प्राथमिकता निर्धारण गरेर बजेट तयार पारेको जनाएका छन् । खासगरी कृषि, पर्यटन, सडक, खानेपानी र रोजगारी सिर्जना सबैजसोको प्राथमिकतामा परेका छन् ।
मधेस प्रदेश सरकारले आज ल्याउन लागेको बजेट ३५ भन्दा बढीको हुने प्रदेशका अर्थ सचिव प्रेम प्रसाद भट्टराईले जानकारी दिनुभयो । बजेटमा, कृषि, उद्योग, पर्यटन, शिक्षा, स्वास्थ्य र पूर्वाधारलाई प्राथामिकता दिईएको उहाँले बताउनुभयो ।
७ प्रदेश मध्य एक प्रदेश कोशीमा भने संसद् अधिवेशन अन्त्य गरिएकोले हिजो नै अध्यादेशमार्फत बजेट ल्याइएको छ । कोशी प्रदेश सरकारका मुख्यमन्त्री हिक्मत कुमार कार्कीले हिजो पत्रकार सम्मेलन गर्दै अध्यादेश मार्फत ल्याएको आर्थिक वर्ष २०८०(८१ को लागि ३६ अर्ब २४ करोड ३५ लाख रुपैयाँ बराबरको बजेट सार्वजनिक गरिसक्नुभएको छ ।
रोजगारी सिर्जना गर्ने लक्ष्यका साथ ल्याइएको बजेटमा कृषि क्षेत्रका लागि २ अर्ब ७ करोड बजेट विनियोजन गरिएको मुख्यमन्त्री कार्कीले बताए । उद्योगतर्फ ४३ करोड, भौतिक पूर्वाधारतर्फ ११ अर्ब ४१ करोड २६ लाख, खानेपानी, सिँचाइ तथा ऊर्जातर्फ ५ अर्ब ४३ करोड ८३ लाख बजेट विनियोजन गरिएको छ ।
यस्तै, स्वास्थ्यतर्फ ३ अर्ब ७ करोड २७ लाख, सामाजिक विकासतर्फ १ अर्ब ७९ करोड ३३ लाख, श्रम तथा रोजगार, भूमि व्यवस्था, वन, वन्यजन्तु तथा जैविक विविधता, पर्यटन लगायत क्षेत्रमा लोकप्रिय तथा प्रचारात्मक कार्यक्रम तथा योजनामा बजेट विनियोजन गरिएको छ ।
