वीरगन्ज महानगरको थप ३ वटा वडा पूर्ण खोप घोषणा, वडा नम्बर १० को स्वास्थ्य चौकी भवनको उदघाटन
ट्रिब्यून न्युज
वीरगन्ज, १३ असार । वीरगन्ज महानगरपालिकाले वडाहरुलाई पूर्ण खोप घोषणा सहित गर्भवती महिलाहरुलाई पौष्टिक आहार समेत वितरण गरेको छ ।
महानगरपालिकाले आज वडा नम्बर १०, ११ र १६ लाई पूर्ण खोपयुक्त वडा घोषणा गर्नुको साथै गर्भवती तथा सुत्केरी महिलाहरुलाई पौष्टिक आहार वितरणको समेत सुरुवात गरेको महानगरपालिकाका सामाजिक तथा स्वास्थ्य महाशाखाका प्रमुख अरुण कुमार महतोले जानकारी दिनुभयो ।
महानगर क्षेत्रका चार हजार गर्भवती तथा सुत्केरी महिलाहरुलाई पौष्टिक आहार वितरण गर्ने कार्यक्रम अनुसार आज महानगरपालिकाका नगर प्रमुख विजय कुमार सरावगीले वडा नम्बर १० का पाँचजना गर्भवती तथा सुत्केरी महिलाहरुलाई पौष्टिक आहार वितरण गरेर शुभारम्भ गर्नुभएको हो ।
महानगर प्रमुख सरावगीले गर्भवती र प्रसुती महिलाहरुलाई अंण्डा, खाने तेल र नुन वितरण गर्नुभएको हो । त्यस्तै नगर प्रमुख विजय कुमार सरावगीले नम्बर १० मा निर्माण सम्म्पन्न भएको आधारभुत स्वास्थ्य चौकी भवनको उद्वघाटन गर्नु भएको छ ।
करिब ४८ लाखको लागतमा निर्मित स्वास्थ्य चौकी भवनको वीरगन्ज महानगरपालिकाका नगर प्रमुख विजय कुमार सरावगीले उदघाटन गर्नुभएको हो । वडा अध्यक्ष रामनगिना साह कानुको अध्यक्षतामा कार्यक्रम भएको हो ।
