बदलिँदो परिस्थितिमा सीमाञ्चलका जनस्तरको सम्बन्ध थप बलियो बनाउनुपर्ने जोड
ट्रिब्यून न्युज
वीरगन्ज, १२ असार । बदलिँदो राजनीतिक परिस्थितिमा नेपाल र भारतबीचको जनस्तरको सम्बन्ध सुदृढ बनाई राख्न चनाखो हुनुपर्ने नेपाल भारत सीमाञ्चलका सरोकारवालाहरुले जोड दिएका छन् ।
मिडिया फोर बोर्डर हार्मोनी संस्थाले आयोजना गरेको ‘बद्लिदो परिस्थितिमा भारत नेपाल सम्बन्ध, चुनौती एवं निदान’ विषयक नेपाल–भारत समिटमा बोल्ने वक्ताहरुले नेपाल र भारतबीच सदियौंदेखिको सम्बन्ध रही आएकोले राजनीतिक कारण अथवा विश्वमा बदलिएको परिस्थितिले नेपाल र भारतका जनस्तरको सम्बन्धलाई कमजोर हुन दिन नहुने बताएका हुन् ।
भारतको बिहार राज्यको वैशाली जिल्लामा रहेको ऐतिहासिक पर्यटकीय स्थल वैशाली गढको थाई अतिथि सदनमा शनिबार आयोजना गरिएको कार्यक्रममा बोल्दै भारतका साँसद तथा पुर्व केन्द्रीय मन्त्री अखिलेशप्रसाद सिंहले१७ किलोमिटरभन्दा लामो नेपाल र भारतको खुल्ला सिमाना दुई देशबीचको विशिष्ट र अभिन्न सम्बन्ध रहेको बताउनुभयो ।
नेपाल र भारतको सीमामा कहिलेकाँही असहज परिस्थिति आउने गरेकोमा त्यसलाई विवेकपूर्ण ढँगले समाधान गर्नुपर्ने बताए । उहाँले दुई देशको सरकारस्तरको सम्बन्ध र जनताबीचको सम्बन्ध खल्बलिन नदिन नेपाल र भारतबीचको सम्बन्धलाई मजबुद बनाउन आवश्यकता रहेको बताउनुभयो ।
भारतका अर्का साँसद अजय निषादले नेपाल र भारतको सम्बन्धलाई बलियो र प्रगाढ बनाईराख्न नागरिक समाजले अहम भूमिका निर्वाह गरेको भन्दै औपचारिक सम्बन्धहरुकाबीच जनस्तरीय अन्तरक्रिया र संवादले पनि थप सदभाव कायम राख्न सहयोग पुग्ने बताउनुभयो ।
नेपालबाट प्रतिनिधित्व गर्नुभएका लोकतान्त्रिक समाजवादी पार्टी, नेपालका मधेस प्रदेशका संसदीय दलका नेता एवं पूर्वमन्त्री जितेन्द्र सोनलले नेपाल नेपाल र भारतबीच विश्वनाथ र पशुपतिनाथ, राम र सीताको प्रचीन कालदेखिको सम्बन्ध नयाँ र बदलिदो कालखण्डमा पनि अझ प्रगाढ बनाउदै लैजान आवश्यक रहेको बताउनुभयो । यस्तो विशिष्ठ सम्बन्धलाई जोगाउन राज्य, समाज र जनता सबैको साझा कर्तब्य रहेको बताउनुभयो ।
वैशालीस्थित थाइ मन्दिरका प्रमुख डा. पीसी चन्द्राले दुई देशबीचको सम्बन्ध बिश्वमैं विशिष्ठ रहेको र यसलाई चीरकालसम्म स्थायीत्व दिनुपर्ने बताउनुभयो । कार्यक्रममा भारतका बिभिन्न पार्टीका बिधान सभा सदस्यहरु, पत्रकार र नागरिक समाजका ब्यक्तिहरुको उपस्थिति रहेको थियो ।
व्यावसायी, पत्रकार र महन्थ सम्मानित
मिडिया फोर बोर्डर हार्मोनी संस्थाले आयोजना गरेको कार्यक्रममा नेपालका होटल व्यावसाय, पत्रकार र महन्थ सम्मान्नित भएका छन् ।
भारतको विहार स्थित वैशाली जिल्लामा भएको वैशाली गढमा आयोजित कार्यक्रममा नेपालका तर्फबाट जानकी मन्दिरका उत्तराधिकारी महन्थ दास, होटेल तथा पर्यटन ब्यवसायी संघ, वीरगन्जका अध्यक्ष हरि पन्त र पत्रकार राम सर्राफलाई नेपाल भारत अन्तराष्ट्रिय मैत्री सम्मानबाट सम्मान गरिएको थियो ।
