सन्दीप लामिछानेलाई फसाउन खोजेको भन्दै वीरगन्जमा प्रदर्शन
ट्रिब्यून न्युज
0
16
वीरगन्ज, २४ भदौ । क्रिकेट खेलाडी सन्दिप लामिछानेलाई षड्यन्त्र गरेर फसाउन खोजिएको भन्दै उनका समर्थकहरुले वीरगन्जमा प्रदर्शन गरेका छन् । वीरगन्जका युवाहरुले सन्दिपलाई फसाउन पाईदैन भन्दै घण्टाघरमा शुक्रबार दिउँसा प्रदर्शन गरेका हुन् ।
सन्दिपका समर्थकहरुले प्रहरीमा परेको जाहेरीको सत्यतथ्य अनुसन्धान गर्न माग पनि गरेका छन् । बलात्कार आरोपित लामिछानेलाई फसाउन खोजिएको र उनको चरित्र हत्या गर्न खोजिएको युवाहरुको आरोप छ ।
अन्तराष्ट्रियस्तरमा नै देशको नाम उच्च बनाउने खेलाडीलाई फसाउन खोजिएको भन्दै सन्दिपका समर्थकहरुले सन्दिपले न्याय पाउनुपर्ने बताएका छन् ।
युवाहरुले ‘सन्दिप दोषी हो भने निर्मला पन्तको दोषी को ?’ नाबालिक भनिएकी पीडितलाई सार्वजनिक गर, सीसीटीभी फुटेज सार्वजनिक गर लगायत लेखिएका प्लेकार्ड सहित घण्टाघरमा प्रदर्शन गरेका हुन् ।
