कार्यक्रम प्रस्तोताहरुको संस्था ‘प्रेजेन्टर्स एसोसियशन अफ नेपाल’ को अध्यक्षमा विवेक खतिवडा
ट्रिब्यून न्युज
वीरगन्ज, २० असार । विभिन्न रेडियो, टेलिभिजन तथा स्टेज कार्यक्रमहरुमा कार्यक्रम प्रस्तोताको रुपमा क्रियाशीलहरु संगठित भएका छन् । आईतबार काठमाडौंमा भएको भेलाले ‘प्रेजेन्टर्स एसोसियशन अफ नेपाल’ संस्थाको घोषणा गरेको छ । काठमाडौ स्थित सांस्कृतिक संस्थानमा पत्रकार सम्मेलन आयोजना गर्दै सो संस्थाको औपचारिक घोषणा गरिएको हो ।
टेलिभिजन, रेडियो तथा स्टेजमा समेत प्रस्तोताको रुपमा कार्यरत संचारकर्मीहरुले कार्यक्रम प्रस्तोता विवेक उपाध्यायको अध्यक्षतामा ११ सदस्यीय कार्यसमित गठन गरेको हो । संस्थाको बरिष्ठ उपाध्यक्षमा मल्भिका सुब्बा रहनु भएको छ ।
काठमाण्डौ महानगरपालिकाकी उपप्रमुख सुनिता डंगोललाई मानार्थ सदस्य राखिएको नवगठित एशोसिएसनका अध्यक्ष विवेक खतिवडाले जानकारी दिनुभयो । संस्थामा बरिष्ठ संचारकर्मीं रमा सिंह , माइकल चन्द र कोमल वलीलाई संरक्षकको रुपममा मनोनयन गरिएको छ ।
यस्तै संचारकर्मी भूषण दाहाल, प्रभात रिमाल, हरिशरण लामिछानेलाई मानार्थ सदस्यका रुपमा मनोनयन गरिएको छ । संस्थाको घोषणाका लागि आयोजना गरिएको पत्रकार सम्मलेनमा बोल्दै काठमाठौं महानगरपालिकाकी उपप्रमुख डंगोलले आगामी दिनहरुमा महानगरपालिका तथा एसोसियशनकाबीच रचनात्मक सहकार्य गर्ने प्रतिबद्धता जनाउनुभयो ।
‘प्रेजेन्टर्स एसोसियशन अफ नेपाल’ संस्थाको कार्य समितिको अन्य पदाधिकारीहरुमा उपाध्यक्ष विवेक सिंह ठकुरी, महासचिवमा जीपी तिमलसेना र कोषाध्यक्षमा निर्णय श्रेष्ठ रहेका छन् । सदस्यहरुमा सुगारीका के.सी., बिना श्रेष्ठ, उरुषा जोशी, अमन प्रताप अधिकारी, खुस्बु प्रधान र सुवेक्षा खड्का रहेका छन् ।
संस्था घोषणाको पत्रकार सम्मेलनमा संस्स्कृतिक संस्थाका जिएम अशोक प्यासी राई लगायत वरिष्ट संचारकर्मीहरुको सहभागिता रहेको थियो ।
