भारत जान लागेका तीन शंकास्पद महिला विजयवस्तीबाट पक्राउ
ट्रिब्यून न्युज
वीरगन्ज, ८ बैशाख । पर्साको विजयवस्तीबाट बुधबार बिहान लुकिछिपी भारत प्रवेश गर्न लागेका २ युवती सहित एक महिला पक्राउ परेका छन् । आफ्नो घर नुवाकोट जिल्लाको तादी गाउँपालिका वडा नंबर १ बताउने दुइजना अन्दाजी २५/२६ बर्षका युवती र उनीहरूलाई भारतको लद्दाखमा रहेको काली मन्दिर घुमाउन लैजादै गरेको बताउने अन्दाजी ४२ बर्षकी महिलालाई प्रहरी चौकी बिजयबस्तीको टोलीले पक्राउ गरेको हो ।
टाटा सुमो रिजर्भ गरेर आएका उनीहरुभारत जानका लागि गाडी नपाएको र बिजयबस्तीकै एक युवालाई मोटरसाइकलमा नर्कटियागंज पु¥याइदिन अनुरोध गरेपछि शंका लागेर ती युवकले प्रहरीमा खबर गरेका थिए । प्रहरी चौकी बिजयबस्तीमा सामान्य सोधपुछ गर्दा ती युवतीहरुले आफ्नो घरमा समेत जानकारी नदिइकन आएको पत्ता लागेपछि उनिहरुलाई थप अनुसन्धानका लागि जिल्ला प्रहरी कार्यालय पर्सामा पठाइएको प्रहरी चौकी बिजयबस्तीले जनाएको छ ।
गहुँगोरो वर्णका दुई युवती र अधबैंसे महिलाले हरेक प्रश्नको शंकास्पद जवाफ दिन थालेपछि प्रहरी चौकी बिजयबस्तीको टोलीले नियन्त्रणमा लिएको हो । नियन्त्रणमा लिएका तीनैजनालाई जिल्ला प्रहरी कार्यालय पर्साको महिला तथा बालबालिका सेलमा राखेर थप अनुसन्धान भईरहेको जिल्ला प्रहरी कार्यालय पर्साले जनाएको छ ।
