काठमाडौँ। प्रधानमन्त्री वालेन्द्र शाह र अष्ट्रेलियाका प्रधानमन्त्री एन्थोनी अल्बानिजबीच शुक्रबार बिहान १० बजे टेलिफोन वार्ता भएको छ।
संवादका क्रममा प्रधानमन्त्री शाहले रसुवाको भोटेकोशी नदीमा गत भदौ १० गते आएको भीषण बाढीका कारण उत्पन्न कठिन परिस्थितिमा अष्ट्रेलिया सरकार र त्यहाँका नागरिकले देखाएको ऐक्यबद्धताप्रति हार्दिक कृतज्ञता व्यक्त गरेको प्रधानमन्त्रीको सचिवालयले जनाएको छ ।
नेपालमा परेको यो विपद्को घडीमा अष्ट्रेलियाले गरेको उद्धार तथा राहत सहयोगको प्रशंसा गर्दै प्रधानमन्त्री शाहले अष्ट्रेलियाबाट प्राप्त विशेषज्ञ टोली, ड्रोन अपरेटर, अत्यावश्यक राहत सामग्री तथा आर्थिक सहयोगका लागि आभार प्रकट गरेका छन् ।
वार्ताका क्रममा प्रधानमन्त्री शाहले बाढीका कारण बेपत्ता भएका अष्ट्रेलियाली नागरिकहरूको खोजी कार्यलाई तीव्रता दिइएको जानकारी समेत दिए । उनले नेपाल र अष्ट्रेलियाबीचको घनिष्ठ सम्बन्धको चर्चा गर्दै आगामी दिनमा पनि खोज, उद्धार, राहत तथा पुनःस्थापनाका कार्यमा निरन्तर सहकार्य रहने प्रतिबद्धता जनाए ।
यस्तै, अष्ट्रेलियाका प्रधानमन्त्री एन्थोनी अल्बानिजले प्राकृतिक विपद्का कारण नेपालले भोगिरहेको क्षति र कठिनाइप्रति गहिरो चासो र चिन्ता व्यक्त गर्दै सहयोग निरन्तर रहने आश्वस्त पारे ।
