चितवन । नेपाल पुलिस स्कुल शान्तिपुर चितवनका शिक्षक र विद्यार्थीहरुले भोटेकोशीमा आएको बाढी प्रभावितहरुको लागि प्रधानमन्त्री दैवीप्रकोप राहत कोषमा रकम जम्मा गरेका छन् ।
पुलिस स्कुलमा अध्ययनरत विद्यार्थीहरुले आफ्नो खाजा खर्च कटाएर जम्मा गरेको रकम र विद्यालयका शिक्षकहरुको एकदिनको तलब बराबरको रकम भोटेकोशी बाढी प्रभावितहरुलाई सहयोग गरेका हुन् ।
विद्यालयमा गठन भएको विभिन्न क्लबमा आवद्ध विद्यार्थीहरुको सक्रियतामा कक्षा १ देखी १० सम्म अध्ययनरत विद्यार्थी, शिक्षक कर्मचारी र अभिभावकहरुबाट समेत स्वेच्छिकरुपमा संकलित रकम विद्यार्थीहरुले बिहीबार विद्यालय प्रशासनलाई हस्तान्तरण गरेका छन ।
प्रधानमन्त्री राहत कोषमा जम्मा गर्ने उद्धेश्यले विद्यार्थीहरुबाट संकलित रकम ४७ हजार ८ सय ६० रुपैया, शिक्षक कर्मचारीहरुले प्रदान गरेको एक दिन बराबरको तलब वापतको रकम ४२ हजार ९ सय २३ रुपैंया र अभिभावकहरुमा समेत संकलित ५ हजार गरी जम्मा ९५ हजार ७ सय ८३ रुपैया विद्यार्थीहरुले विद्यालय प्रशासनलाई हस्तान्तरण गरेका छन् ।
भदौ १० गते रसुवाको भोटेकोशीमा आएको बाढीबाट प्रभावितहरुलाई सबै क्षेत्रबाट सहयोग उपलब्ध भईरहेको देखेर विद्यार्थीहरुले आफ्नो खाजा खर्च बचाएर सहयोग गरेका हुन् ।
नेपाल पुलिस स्कुल शान्तिपुर चितवनले विद्यार्थीहरुलाई नियमित पठनपाठनका साथै सुरक्षा, शिक्षा, अनुशासन र सामाजिकताको बारेमा समेत बिशेष प्रशिक्षण गर्दै आईरहेकाले विद्यार्थीहरुमा मानवीय सहायता एवम सहयोगी भावनाको विकास भएको विद्यालयका समादेशक प्रहरी निरीक्षक रोशन थापाले जानकारी दिए ।
विद्यार्थीहरुले आफ्नो खाजा खर्च मात्रै संकलन नगरी शिक्षक एवम कर्मचारीका साथै आफ्ना अभिभावकहरुलाई समेत सहयोगको लागि अपिल गरेका थिए ।
कतिपय अभिभावहरुले विद्यालय प्रशासनमानै आएरै सहयोग रकम हस्तान्तरण गरेका थिए भने कतिपयले विभिन्न माध्यमबाट प्रधानमन्त्री राहत कोषमा सहयोग उपलब्ध गराएको जानकारी दिएका छन ।
कक्षा १ देखी १० सम्म गरी सात सय जना विद्यार्थी, ४० जना शिक्षक कर्मचारी र अभिभावकको समेत गरी संकलित ९५ हजार ७ सय ८३ रुपैयाविद्यालय प्रशासनमा प्राप्त भएको हुँदा प्रधानमन्त्री राहत कोषमा जम्मा गरीने विद्यालयका समादेशक प्रहरी निरीक्षक थापाले बताए ।
विद्यालयले शिक्षक, अभिभावक र विद्यार्थीहरुलाई समेत विभिन्न समयमा विपदीय जोखीम न्युनिकरण, दुर्घटना न्युनिकरण, कानुनी एवम सुरक्षा सचेतनाका साथै सामाजिक व्यवहार एवम आचरणको बारेमा समेत विभिन्न कार्यक्रम संचालन गर्दै आईरहेको छ ।
गत भदौ १० गते नेपाल पुलिस स्कुल शान्तिपुर चितवनले कक्षा ६ देखी १० सम्म अध्ययनरत विद्यार्थीका अभिभावकको निशुल्क स्वास्थ्य परिक्षण गर्नुका साथै एक अभिभावक एक विरुवा वितरण कार्यक्रम संचालन गरेको थियो ।
