वीरगन्ज । रसुवासहित देशका विभिन्न जिल्लामा बाढी–पहिरोका कारण प्रभावित नागरिकको उद्धार तथा राहतका लागि वीरगन्ज हेल्थ केयर अस्पतालले १० लाख रुपैयाँ सहयोग गरेको छ ।
अस्पतालले उक्त रकम प्रधानमन्त्री दैवी प्रकोप उद्धार कोषमा जम्मा गराएको हो ।
शुक्रबार दिउँसो पर्सा क्षेत्र नम्बर १ का सांसद बुद्धि प्रसाद (हरि) पन्त मार्फत सहयोग रकम कोषमा जम्मा गरिएको अस्पतालका अध्यक्ष अबुलहैस अन्सारीले जानकारी दिए ।
अस्पतालले बाढी–पहिरोमा परी ज्यान गुमाएका नागरिकप्रति श्रद्धाञ्जली व्यक्त गर्दै शोकसन्तप्त परिवारजनप्रति समवेदना समेत प्रकट गरेको छ ।
अध्यक्ष अन्सारीका अनुसार विपद्को समयमा प्रभावितको उद्धार र राहतका लागि राज्यका साथै निजी क्षेत्र, सामाजिक संघसंस्था र नागरिक स्तरबाट पनि क्षमताअनुसार सहयोग हुनुपर्छ ।
“विपद्का कारण धेरै नागरिकले अकालमा ज्यान गुमाएका छन् र हजारौँ परिवार प्रभावित बनेका छन्,” उनले भने, “यो कठिन समयमा प्रभावितको उद्धार र राहतमा सहयोग पुगोस् भन्ने उद्देश्यले अस्पतालको तर्फबाट १० लाख रुपैयाँ सहयोग गरेका हौँ ।”
अन्सारीले प्रभावितको खोजी, उद्धार, उपचार तथा पुनःस्थापनामा भइरहेको सरकारी प्रयासमा निजी क्षेत्रले पनि निरन्तर सहकार्य गर्नुपर्नेमा जोड दिए ।
अस्पतालले आगामी दिनमा पनि विपद् प्रभावित नागरिकको नि:शुल्क उपचार तथा अन्य मानवीय सेवाका कार्यमा सहकार्य जारी राख्ने प्रतिबद्धता जनाएको छ ।
