काठमाडौं । ग्यास व्यवसायीहरूले आगामी सोमबारदेखि पूर्ण तौलकै सिलिन्डर बिक्री गर्ने भएका छन् ।
ग्यास विक्रेता महासंघ र नेपाल एलपी ग्यास उद्योग संघको संयुक्त बैठकले सरकारको औपचारिक निर्देशनको पर्खाइ नगरी उपभोक्ताको हित र व्यावसायिक बाध्यतालाई ध्यानमा राख्दै १४.२ किलोकै ग्यास बजारमा पठाउने उद्घोष गरेको हो।
महासंघका अध्यक्ष ज्ञानेश्वर अर्यालका अनुसार डिजेलको मूल्यमा भएको भारी वृद्धिका कारण आधा सिलिन्डर ढुवानी गर्दा लागत खर्च नै नउठ्ने स्थिति आएपछि व्यवसायीहरू यो कठोर कदम चाल्न बाध्य भएका हुन्।
बजारमा देखिएको ग्यास अभावलाई सम्बोधन गर्न सरकारले अघि सारेको ‘आधा सिलिन्डर’ नीतिलाई लत्याउँदै व्यावसायीहरुले यो निर्णयमा पुगेका हुन् । व्यवसायीहरूको यो निर्णय केवल जिद्दी मात्र नभएर गम्भीर प्राविधिक र आर्थिक समस्याको उपज पनि देखिन्छ।
अहिले ग्यास उद्योगका बुलेटहरू भरिभराउ छन्, तर बजारमा ७.१ किलोका आधा सिलिन्डर मात्र पठाउने नियमले गर्दा ग्यास अनलोड हुन पाएको छैन। उपभोक्ताका घरमा आधा तौलका सिलिन्डर थुप्रिँदा र उद्योगमा बुलेटहरू जाम भएर बस्दा आपूर्ति चक्र नै ठप्प हुने जोखिम बढेको छ।
अध्यक्ष अर्यालले नेपाल आयल निगमको अहिलेको ‘अदूरदर्शी’ कार्यशैली कायम रहेमा आगामी दुई महिनाभित्र मुलुकले ग्यासको चरम हाहाकार भोग्नुपर्ने चेतावनी समेत दिएका छन्।
ढुवानी खर्चको उचित व्यवस्थापन नभए र पूर्ण क्षमतामा कारोबार गर्न नपाए व्यवसाय नै बन्द गर्नुपर्ने अवस्थामा पुगेको उनीहरूको तर्क छ। व्यवसायीहरूले यसबारे भोलि सरकारलाई औपचारिक रूपमा जानकारी गराउने तयारी गरेका छन्।
यसरी एकातिर आयल निगमले भविष्यको संकट टार्न सावधानी अपनाएको दाबी गरिरहँदा, अर्कोतिर व्यवसायीहरूले भने निगमको नीति नै संकटको बीउ भएको भन्दै खुला चुनौती दिएका छन्।
