वीरगञ्ज । मानवीय सेवाका क्षेत्रमा क्रियाशील संस्था उपकार सेवा नेपालले मुसहर समुदायका शारिरिक रुपमा अशक्त व्यक्तिलाई ह्विलचेयर सहयोग गरेको छ ।
वीरगञ्ज महानगरपालिका वडा नम्बर २२, मनियारी निवासी शारीरिक रूपमा पूर्ण अपाङ्गता भएका स्थानीय दलित मुसहर समुदायका एक व्यक्तिलाई हिँडडुलमा सहजताका लागि एक थान ह्विलचेयर प्रदान गरेको हो।
वीरगञ्जमा आयोजित एक संक्षिप्त कार्यक्रमका बीच उपकार सेवा नेपालकी अध्यक्ष विद्या कुमारी सरावगीले सम्बन्धित व्यक्तिलाई सो ह्विलचेयर हस्तान्तरण गरिन् ।
शारीरिक रूपमा निकै कष्टकर जीवन बिताइरहेका ती व्यक्तिलाई दैनिक क्रियाकलापमा टेवा पुगोस् भन्ने उद्देश्यले यो सहयोग गरिएको संस्थाले जनाएको छ।
कार्यक्रममा समाजसेवी प्रकाश थारु लगायत स्थानीय भद्रभलादमीहरूको उपस्थिति रहेको थियो। सहयोग हस्तान्तरण गर्दै अध्यक्ष सरावगीले समस्यामा परेका र विपन्न वर्गका मानिसहरूलाई सहयोग गर्नु नै संस्थाको मुख्य धर्म भएको बताए ।
उपकार सेवा नेपालले यसअघि पनि जिल्लाका विभिन्न दुर्गम तथा ग्रामीण भेगहरूमा पुगेर गरिब, असहाय र आवश्यकता भएका व्यक्तिहरूलाई समय–समयमा विभिन्न किसिमका सहयोग सामग्रीहरू उपलब्ध गराउँदै आएको छ।
आगामी दिनहरूमा पनि यस्ता सामाजिक र मानवीय कार्यहरूलाई निरन्तरता दिने प्रतिबद्धता संस्थाले व्यक्त गरेको छ।
