लहान, १ वैशाख । नयाँ वर्ष २०८३ को अवसरमा सिराहाको प्रसिद्ध ऐतिहासिक तथा धार्मिक पर्यटकीय स्थल ‘सलहेश फूलबारी’मा भव्य मेला लागेको छ। वर्षको एक दिन वैशाख १ गतेका दिन मात्र फुल्ने विश्वास गरिने दुर्लभ ‘सुनाखरी’ फूलको दर्शन र पूजाअर्चना गर्न बिहानैदेखि श्रद्धालुहरूको ठूलो घुइँचो लागेको छ।
लहान नगरपालिका वडा नम्बर १२ र २२ मा पर्ने करिब नौ बिघा क्षेत्रफलमा फैलिएको यस फूलबारीमा रहेको हारमको रूखमा सुनाखरी फूल ढकमक्क फक्रिएपछि यसले पर्यटकहरूलाई लोभ्याएको छ। १४औँ शताब्दीका लोकनायक राजा सलहेश र उनकी प्रेमिका मालिनीको अमर प्रेमको प्रतीकका रूपमा यो फूललाई लिइन्छ।
किंवदन्ती अनुसार, हरेक वर्ष वैशाख १ गतेका दिन राजा सलहेशको प्रतीक्षामा मालिनी फूलका रूपमा प्रकट हुने विश्वास गरिन्छ। यही अलौकिक दृश्यको अवलोकन गर्न र प्रेमको गाथालाई स्मरण गर्दै पूजापाठ गर्न नेपालका विभिन्न जिल्लाका साथै सीमावर्ती भारतीय सहरहरूबाट समेत हजारौँको सङ्ख्यामा पर्यटक र दर्शनार्थीहरू आइपुगेका छन्।
दर्शनार्थीहरूको भीडले अहिले सलहेश फूलबारी क्षेत्र उत्सवमय बनेको छ। भक्तजनहरूमाझ नयाँ वर्षको पहिलो दिन यस अनौठो प्राकृतिक र सांस्कृतिक सम्पदाको दर्शन गर्नाले मनोकाङ्क्षा पूरा हुने जनविश्वास रहिआएको छ।
बढ्दो भीडलाई मध्यनजर गर्दै स्थानीय प्रशासन र मेला व्यवस्थापन समितिले कडा सुरक्षा प्रबन्ध मिलाउनुका साथै दर्शनार्थीहरूका लागि विशेष व्यवस्थापन गरेको छ।
