वीरगन्ज । नेपाल बीमा प्राधिकरण, मधेश प्रदेश कार्यालयले सम्पत्ति शुद्धीकरण तथा आतंककारी क्रियाकलापमा वित्तीय लगानी निवारण सम्बन्धी दुई दिने अन्तरक्रिया तथा छलफल कार्यक्रम सफलतापूर्वक सम्पन्न गरेको छ।
कार्यक्रमको पहिलो दिन चैत्र २० गते विभिन्न बीमा कम्पनीका अन्डरराइटिङ कर्मचारी तथा शाखा प्रमुखहरूसँग सम्बन्धी विद्यमान नियम, कानुन र व्यवहारिक कार्यान्वयनका विषयमा विस्तृत छलफल गरिएको थियो।
सहभागीहरूलाई जोखिम पहिचान, ग्राहकको उचित पहिचान तथा शंकास्पद कारोबारको पहिचान गरी प्रतिवेदन पेश गर्ने प्रक्रियाका बारेमा प्राविधिक जानकारी प्रदान गरिएको थियो।
दोस्रो दिन चैत्र २१ गते भने बीमक संस्थाका प्रदेश प्रमुखहरूसँग उच्च तहको नीति, नियमन र कार्यान्वयन रणनीतिका विषयमा गहन अन्तरक्रिया गर्दै संस्थागत उत्तरदायित्व र आन्तरिक नियन्त्रण प्रणाली सुदृढ बनाउने उपायहरूमा जोड दिइएको थियो।
सम्पत्ति शुद्धीकरण निवारणका लागि बीमा क्षेत्रको भूमिका महत्वपूर्ण हुने उल्लेख गर्दै कार्यक्रममा सबै सरोकारवालाहरूलाई सचेत र जिम्मेवार भएर कार्य गर्न आग्रह गरिएको थियो।
कार्यक्रमका सभाध्यक्ष एवं नियमन महाशाखा प्रमुख शाम्भा राज लामिछानेले वित्तीय प्रणालीलाई सुरक्षित र पारदर्शी बनाउन प्रभावकारी कार्यान्वयन अनिवार्य रहेको बताए ।
बीमकहरूले जोखिम मूल्याङ्कन र समयमै शंकास्पद कारोबारको पहिचान गरी वित्तीय अपराध नियन्त्रणमा योगदान पुर्याउनुपर्ने धारणा राख्दै उनले यस्ता कार्यक्रमले कर्मचारीको कार्यक्षमता र कानुनी अनुपालनमा एकरूपता ल्याउने विश्वास व्यक्त गर्दै कार्यक्रम समापन गरे ।
कार्यक्रममा प्राधिकरणको नियमन महाशाखा प्रमुख शाम्भा राज लामिछाने र सम्पत्ति शुद्धीकरण निवारण शाखा प्रमुख पदम प्रसाद सोडारीको विशेष उपस्थिति रहेको थियो।
कार्यक्रममा मधेश प्रदेश कार्यालयका प्रमुख आर्या रावल, सहायक निर्देशकहरू महेश मण्डल र सुस्मा थापा तथा सहायक प्रथम निकेश लाल कर्ण लगायत ६ जना प्रतिनिधिहरूको सहभागिता रहेको थियो। कार्यालय प्रमुख आर्या रावलले स्वागत मन्तव्य राखेको कार्यक्रमको पहिलो दिन सुस्मा थापा र दोस्रो दिन महेश मण्डलले सञ्चालन गेका थिए ।
