यस पटकको निर्वाचनमा पर्साका सबै क्षेत्र ‘हट सिट’ का रूपमा चर्चित छन्। चुनावी मैदानमा चार जना प्रभावशाली पूर्वमन्त्रीहरू—प्रदीप यादव, अजय चौरसिया, रमेश रिजाल र सुरेन्द्र चौधरी—को उपस्थिति रहेकाले यो प्रतिस्पर्धालाई निकै रोचक र प्रतिष्ठाको लडाइँका रूपमा हेरिएको छ।
राष्ट्रिय राजनीतिमा प्रभाव राख्ने यी ‘हेभिवेट’ नेताहरूको भविष्य जनताले बाकसमा कैद गरिसकेका छन्, जसको छिनोफानो अबका केही दिनमा हुनेछ।
मतगणनाको पारदर्शिता र सुरक्षाका लागि विशेष प्रबन्ध मिलाइएको छ। गणना स्थलहरूमा तारजाली लगाइनुका साथै सीसीटीभी क्यामराबाट प्रत्यक्ष निगरानी गरिएको छ।
सुरक्षाकर्मीको बाक्लो उपस्थितिबीच हरेक एक-एक घण्टामा आधिकारिक मत परिणाम सार्वजनिक गर्ने तयारी गरिएको छ। सम्भवतः आज मध्यान्ह १२ बजेपछि प्रारम्भिक नतिजाहरू बाहिर आउन थाल्ने र त्यसले चुनावी लहरको संकेत दिने अनुमान गरिएको छ।
